Komisioneri i Zgjerimit pranë Komisionit Evropian, Oliver Varhelyi ka zhvilluar një takim me Presidentin Ilir Meta në selinë e Presidencës.
Komisioneri shkruan në Twiter se ka diskutuar në lidhje me reformat që Shqipëria duhet të ndërmarrë për rrugën e integrimit, si dhe ëshët diskutuar Plani Ekonomik dhe i Investimeve për Ballkanin Perëndimor.
Pas tij ka reaguar edhe Presidenti Meta, i cili shkruan në Facebook se e ka informuar Komisionerin për rikthimin në Kuvend të ndryshimeve të njëanshme të Kodit Zgjedhor.
Reagimi i plotë
Kënaqësi të takohesha me Komisionerin për Politikën e Fqinjësisë Europiane dhe Negociatat e Zgjerimit, z. Oliver Varhelyi.
E falenderova për të gjitha përpjekjet e tij dhe të institucioneve europiane për të mbështetur integrimin europian të Shqipërisë.
Duke u ndalur tek reforma zgjedhore, përcaktuar si kusht themelor për nisjen e negociatave të anëtarësimit, e informova Komisionerin se do të rikthej për rishqyrtim në Kuvend ndryshimet e njëanshme të Kodit Zgjedhor.
Duke mirëkuptuar kërkesën dashamirëse të Grupit të PPE në Parlamentin Europian për t’i dhënë edhe një mundësi Kuvendit një-partiak të tërhiqet nga minimi i procesit zgjedhor, me pasoja të rënda e afatgjata ndaj integrimit europian të Shqipërisë, uroj që pushteti të kthehet tek Marrëveshja konsensuale e 5 Qershorit.
E garantova Komisionerin Varhelyi se çdo zgjidhje do të vijë nga populli shqiptar.
25 Prilli do të jetë një referendum popullor që do t’u japë përgjigjen e merituar të gjithëve atyre që tentojnë të luajnë me të ardhmen europiane të vendit.
