Aktualitet

Meta kujton 7 prillin e pushtimit fashist: Edhe pse të braktisur...

Shkruar nga Liberale
Meta kujton 7 prillin e pushtimit fashist: Edhe pse të braktisur...

Presidenti Ilir Meta kujton 7 prillin e 1939, kur fashistët pushtuan Shqipërinë me një mesazh në “Facebook”.

Meta shkruan se 7 prilli është një ditë e hidhur si vetë pabesia në historinë tonë, por edhe një ditë nderimi për rezistencën heroike të ushtarakëve patriotë, me në krye Heroin tonë Mujo Ulqinaku.

Sipas Kreut të Shtetit, edhe pse shqiptarët ishin të vetëm dhe të braktisur nga të gjithë, ju përgjigjën pabesisë së pushtuesve fashistë me patriotizmin e bijve më atdhetarë të këtij vendi.

Kujtojmë se vitin e kaluar, në 24 nëntor 2019, me rastin e 75-vjetorit të Çlirimit të Shqipërisë, Presidenti Meta, i akordoi Mujo Ulqinakut, Dekoratën më të lartë që ekziston sot në Republikën e Shqipërisë, me motivacionin:

"Për heroizmin, trimërinë dhe sakrificën më sublime në mbrojtje të sovranitetit territorial të atdheut, lirisë dhe pavarësisë së Shqipërisë, si shembull monumental i patriotizmit dhe atdhedashurisë, si simbol i mbrojtjes së dinjitetit kombëtar, si model i ushtarakut që i qëndron deri në fund betimit para Flamurit Kombëtar", u shpreh kreu i Shtetit.

Postimi i Metës:

Sot është 7 prilli, një ditë e hidhur si vetë pabesia në historinë tonë. Por është edhe një ditë nderimi për rezistencën heroike të ushtarakëve patriotë, me në krye Heroin tonë Mujo Ulqinaku.

Edhe pse të vetëm dhe të braktisur nga të gjithë, ne shqiptarët ju përgjigjëm pabesisë të pushtuesve fashistë me patriotizmin e bijve më atdhetarë të këtij vendi, të cilët ju kundërvunë me vetëmohim njërës prej fuqive më të mëdha të kohës.

Ndaj sot, ne shqiptarët përulemi me nderimin më të thellë para sakrificës sublime të ushtarakëve patriotë dhe djemve më të mirë të Atdheut, të cilët me bindje të plotë dhanë edhe jetën e tyre për mbrojtjen e lirisë, pavarësisë dhe dinjitetit kombëtar, duke shënuar dhe fillimin e Rezistencës Antifashiste të popullit shqiptar.

Mirënjohje të përjetshme Heroit tonë të Rezistencës Antifashiste Mujo Ulqinaku dhe të gjithë patriotëve të tjerë, të cilët përmbushën me nder betimin e tyre para Flamurit Kombëtar, duke e larë atë edhe me gjakun e tyre të paharruar.  /Gazeta Liberale

https://www.facebook.com/ilirmetazyrtar/posts/2918862124826708

Liberale Newsroom

Poll
SHQIPENGLISH