Aktualitet

Mbi 45 mijë të vdekur nga tërmetet në Turqi e Siri, dhjetëra njerëz rezultojnë të zhdukur

Shkruar nga Liberale

Më shumë se 45,000 njerëz kanë vdekur në tërmetin që goditi Turqinë dhe Sirinë dhe numri pritet të rritet në mënyrë dramatike pasi 264,000 apartamente janë shkatërruar në Turqi dhe shumë njerëz janë ende të zhdukur në fatkeqësinë më të rëndë në historinë moderne të vendit.

Njëmbëdhjetë ditë pas tërmetit vdekjeprurës, tre të mbijetuar u liruan dje, të premten, nga rrënojat e ndërtesave në Turqi. Numri i të vdekurve në vend mbetet në 39,672, ndërsa në Sirinë fqinje janë raportuar mbi 5,800 vdekje. Numri në Siri mbetet i njëjtë prej ditësh.

Dje në xhamitë në mbarë botën u falen lutjet përkujtimore për të vdekurit e tërmetit në të dy vendet, për shumë prej të cilëve nuk ka qenë e mundur të ndiqen ritet e plota të varrimit duke pasur parasysh përmasat e fatkeqësisë.

Edhe pse shumë ekipe ndërkombëtare të shpëtimit janë larguar nga zona e gjerë e tërmetit, ekipet vendase vazhduan të kërkojnë sot ndërtesat e rrafshuara, me shpresën për të gjetur njerëz të tjerë që mund të kenë arritur të qëndrojnë gjallë përtej çdo pritshmërie. Sipas ekspertëve, shumica e shpëtimit ndodhin në 24 orët pas një tërmeti.

Hakan Yasinoglu, rreth 40 vjeç, u shpëtua në provincën Hatay të Turqisë jugore 278 orë pas tërmetit 7.8 ballë që goditi më 6 shkurt, sipas Departamentit të Zjarrfikësve të Stambollit.

Më herët, 14-vjeçari Osman Halebiye dhe 34-vjeçari Mustafa Avci u shpëtuan në Antakya (Antioki), Turqi. Gjatë transportit, Avci ka komunikuar me video-telefonatë me prindërit e tij, të cilët i kanë treguar foshnjën e porsalindur.

“Kisha humbur plotësisht çdo shpresë. Është një mrekulli e vërtetë. Më kthyen djalin tim. Pashë rrënojat dhe mendova se askush nuk do të dilte i gjallë prej andej”, tha babai i tij.

Avci, i rraskapitur, më pas takoi gruan e tij Bilge dhe vajzën Almile në një spital në Mersin.

Organizatat e ndihmës vënë në dukje se të mbijetuarit do të kenë nevojë për ndihmë për muaj të tërë pasi shumë infrastruktura të rëndësishme janë shkatërruar.

Në Sirinë fqinje, tashmë të shkatërruar nga më shumë se një dekadë e luftës civile, shumica e viktimave janë në veriperëndim, një zonë e kontrolluar nga rebelët që janë në luftë me presidentin Bashar al-Assad. Konflikti ka komplikuar përpjekjet për të ndihmuar të prekurit nga tërmeti.

Të dyja palët u përleshën gjatë natës për herë të parë që nga fatkeqësia, me forcat qeveritare që bombarduan periferi të Atareb, një qytet i kontrolluar nga rebelët i goditur keq nga tërmeti, tha dje Observatori Sirian për të Drejtat e Njeriut. Reuters nuk ishte në gjendje të verifikonte në mënyrë të pavarur këtë informacion.

Mijëra sirianë që kishin kërkuar strehim në Turqi për t'i shpëtuar luftës civile të vendit të tyre janë kthyer në shtëpi në zonën e luftës - të paktën tani për tani.

As Turqia dhe as Siria nuk kanë bërë të ditur se sa persona janë ende të zhdukur pas tërmetit.

Zemërimi po rritet në mesin e familjeve që ende presin lajmet e të afërmve të tyre në Turqi për ato që ata thonë se janë praktika korruptive të ndërtimit dhe një zhvillim urban me të meta që ka rezultuar në shembjen e mijëra shtëpive dhe bizneseve.

Një ndërtesë e tillë ishte Ronesans Rezidans, e cila u shemb në Antakia, duke vrarë qindra.

“Thuhej se ishte e sigurt për tërmete, por rezultati mund të shihet”, tha 47-vjeçari Hamza Alpaslan, vëllai i të cilit jetonte në pallat. “Është në një gjendje të tmerrshme. Nuk ka as çimento dhe as hekurat e duhura në të. Është me të vërtetë ferr”.

Turqia është zotuar të hetojë këdo që dyshohet se është përgjegjës për shembjen e ndërtesës dhe ka urdhëruar arrestimin e më shumë se 100 të dyshuarve, përfshirë ndërtuesit.

OKB-ja bëri thirrje të enjten për të mbledhur më shumë se 1 miliard dollarë fonde për operacionin e ndihmës në Turqi dhe 400 milionë dollarë për të ofruar ndihmë për sirianët./Liberale.al

Liberale Newsroom

Poll
SHQIPENGLISH