Regjisori, producenti dhe aktori i njohur amerikan, Tyler Perry, është paditur nga aktori Derek Dixon për ngacmim seksual, sulm fizik dhe dhunë në vendin e punës. Padia u dorëzua në Gjykatën e Lartë të Los Angeles më 13 qershor 2025 dhe përmban akuza të rënda që, nëse vërtetohen, mund të kenë pasoja të mëdha ligjore dhe profesionale për Perry.

Sipas dokumenteve të dorëzuara në gjykatë dhe raportimeve të mediave si TMZ dhe Washington Post, Derek Dixon pretendon se ngacmimi filloi që në vitin 2019, kur ai mori një rol në serialin televiziv “The Oval”, i prodhuar nga Tyler Perry Studios dhe transmetuar në BET. Dixon tregon se Perry e kishte zgjedhur atë nga një turmë gjatë një eventi publik dhe i kishte kërkuar numrin e telefonit me premtimin për një mundësi pune në një projekt të ri.

Pasi e mori rolin e “Dale” në serial, Dixon pohon se Perry nisi t’i dërgonte mesazhe me përmbajtje seksuale dhe provokative. Ai përshkruan disa raste të veçanta ku producenti e pyeste për preferencat seksuale dhe i bënte komente të papërshtatshme për pamjen dhe sjelljen e tij.

Më tej, Dixon thotë se u ndje i frikësuar të refuzonte qartë sjelljet e Perry-t, pasi kishte frikë se do të humbiste rolin apo do të penalizohej në karrierën e tij si aktor. Incidenti më i rëndë, sipas padisë, ka ndodhur në vitin 2021 në shtëpinë e Perry-t në Atlanta. Dixon pretendon se Perry hyri në dhomën e tij ndërsa ai ishte vetëm me të brendshme dhe tentoi ta ngacmonte fizikisht, duke i tërhequr të brendshmet dhe duke i bërë propozime seksuale. Ai pohon se e refuzoi dhe u përpoq të shmangte situatën duke ndryshuar temën.

Në padi thuhet gjithashtu se Perry e përshkruante personazhin që ai luante – një djalë i pastrehë dhe i dëshpëruar që përfshihej në marrëdhënie për interes – si një pasqyrim të asaj që kërkonte nga një partner në jetën reale.

Derek Dixon deklaron se ka duruar ngacmime të tilla për disa vite, derisa në qershor të vitit 2024 paraqiti një ankesë zyrtare në Komisionin për Mundësi të Barabarta në Punësim (EEOC). Pas kësaj, ai vendosi të largohej nga seriali, duke thënë se nuk mund ta duronte më ngacmimin dhe presionin psikologjik.

Përmes padisë, ai po kërkon 260 milionë dollarë dëmshpërblim nga Tyler Perry dhe kompania e tij, duke përfshirë kompensim për dëmet emocionale, humbjen e mundësive profesionale dhe traumën që pretendon se ka përjetuar.

Avokati i Tyler Perry-t, Matthew Boyd, reagoi menjëherë ndaj padisë, duke e quajtur atë “një mashtrim të mirëorganizuar” nga ana e Dixon. “Ky është një individ që iu afrua Tyler Perry-t me një axhendë të fshehur. Jemi të bindur se këto pretendime të sajuara do të dështojnë në gjykatë,” tha Boyd për TMZ.

Për momentin, Perry vetë nuk ka dhënë një deklaratë personale publike.