Pas tri etapave të mbushura me entuziazëm në Shqipëri, Giro d’Italia 108 përmbylli aventurën shqiptare me etapën e fundit në Vlorë. Tashmë, karvani i madh i Giro-s është zhvendosur drejt Puglias në Itali, ku do të rifillojë gara pas pushimit të parë zyrtar.
Sot, nga aeroporti i Tiranës janë nisur dy fluturime çarter për të transportuar 23 skuadrat pjesëmarrëse: i pari në orën 12 (me 13 skuadra) dhe i dyti në orën 13 (me 10 skuadra), me destinacion Brindisi.
Ndërkohë, mjetet logjistike dhe automjetet shoqëruese janë nisur më herët: një anije nga Durrësi për në Bari, dhe dy të tjera nga Vlora drejt Brindisit – një prej të cilave do të bëjë edhe një udhëtim shtesë sot. Në total, janë realizuar 4 udhëtime detare, që kanë transportuar 955 persona, 225 automjete, 190 furgonë dhe kamionë (mbi 12 m), 25 autobusë dhe 4 ambulanca.
Të martën, më 13 maj, do të rifillohet gara me etapën e katërt dhe të parën në tokën italiane.
