Gara prestigjioze e çiklizmit, Giro d’Italia, ka zbarkuar në Shqipëri me një ceremoni të veçantë në Sheshin Skënderbej, ku u prezantuan ekipet dhe çiklistët që do të garojnë në këtë edicion. Ky është edicioni i 108-të i garës, dhe Shqipëria është destinacioni i parë jashtë Italisë që e mirëpret këtë ngjarje.

Në total, 194 çiklistë nga 22 skuadra do të marrin pjesë në këtë garë, duke përfshirë ekipe të njohura si UAE Team Emirates, Ineos Grenadiers, Movistar, Bora-Hansgrohe, dhe shumë të tjera. Çiklistë të njohur ndërkombëtarë, si Egan Bernal, Primož Roglič, Juan Ayuso dhe Nairo Quintana, janë ndër emrat që do të garojnë për të fituar çmimin prestigjioz të maglia rosa.

Kryeministri Edi Rama ishte i pranishëm në ceremoninë e prezantimit, ku shprehu mbështetje për këtë ngjarje të rëndësishme sportive dhe theksoi rëndësinë e saj për promovimin e Shqipërisë në arenën ndërkombëtare.

Gara do të zhvillohet nga data 9 deri më 11 maj, me tri etapa që do të kalojnë në qytetet e Durrësit, Tiranës dhe Vlorës. Etapa e parë do të nisë më 9 maj nga Porti i Durrësit dhe do të përfundojë në Sheshin "Nënë Tereza" në Tiranë. Etapa e dytë, më 10 maj, do të zhvillohet brenda kryeqytetit, ndërsa etapa e tretë, më 11 maj, do të kalojë në Vlorë, duke përfshirë një itinerar malor që do të sfidojë çiklistët.