Ecja dhe vrapimi janë dy ndër format më të zakonshme dhe më të dobishme të aktivitetit fizik. Të dyja këto lëvizje të thjeshta mund të kenë ndikim të madh në shëndetin tuaj – si fizik, ashtu edhe mendor. Por cila prej tyre është më e përshtatshme për ju?

Në një analizë të përfitimeve dhe rreziqeve që sjellin ecja dhe vrapimi, ekspertët theksojnë se të dyja këto ushtrime kardiovaskulare ofrojnë rezultate pozitive, në varësi të qëllimit që ka secili.

Ecja është një nga format më të sigurta të stërvitjes. Nuk kërkon pajisje të veçanta dhe është e arritshme për njerëz të të gjitha moshave dhe niveleve të fitnesit. Përfitimet e ecjes janë të shumta:

Ndihmon në ruajtjen e peshës së shëndetshme
Ul tensionin e gjakut dhe përmirëson qarkullimin
Rrit energjinë dhe përmirëson gjumin
Zvogëlon stresin dhe përmirëson humorin
Ecja me ritëm të shpejtë (3–5 km/h) është veçanërisht efektive. Një orë ecje me intensitet mesatar mund të djegë po aq kalori sa vrapimi i ngadaltë.

Nëse qëllimi juaj është të humbni peshë sa më shpejt, atëherë vrapimi është zgjidhja më e mirë. Vrapimi djeg rreth dyfishin e kalorive në krahasim me ecjen për të njëjtën kohë.

Sipas studimeve, 10 minuta vrap në ditë mund të përmirësojnë ndjeshëm shëndetin mendor dhe të reduktojnë simptomat e depresionit e ankthit.

Cili është më i mirë për ju?
Nuk ka një përgjigje të vetme për të gjithë. Nëse jeni fillestarë, ose keni probleme me kyçet dhe gjunjët, ecja është mënyra më e mirë për të nisur. Por nëse keni qëndrueshmëri fizike dhe synoni humbje më të shpejtë peshe, vrapimi mund t’ju përshtatet më shumë.

Ekspertët rekomandojnë një kombinim të të dyjave: alternoni ecjen me periudha të shkurtra vrapimi, për një stërvitje efektive dhe të balancuar.