Shakira tha se ka anuluar koncertin që do të mbante mbrëmjen e së dielës në Lima, Peru, në kuadër të turneut të saj në Amerikën Latine, pasi u shtrua në spital për një problem me barkun. “Me keqardhje ju informoj se më është dashur të shkoj në dhomën e urgjencës për një problem abdominal dhe aktualisht jam shtruar në spital”, tha këngëtarja e njohur kolumbiane në një deklaratë të postuar në llogarinë e saj zyrtare X të dielën.
Shakira shtoi se mjekët i thanë se ajo "nuk ishte e aftë" për të performuar. Ylli dhe fituesi i fundit i Grammy për albumin më të mirë të popit latin për "Las mujeres no lloran" do të performonte të dielën dhe të hënën në stadiumin kombëtar në kryeqytetin peruan, pas një mungese 14-vjeçare.
Në deklaratën e saj, Shakira tha se shpreson të shërohet shpejt: "Plani im është të performoj sa më shpejt që të jetë e mundur. Ekipi im dhe promotori tashmë janë duke punuar për një datë të re."
Turneu i ri botëror i Shakira-s filloi në Rio de Zhaneiro: këngëtarja kolumbiane 48-vjeçare mbajti koncertin e parë të turneut të saj “Las Mujeres Ya No Lloran World Tour” mbrëmë në stadiumin Engenhao në metropolin brazilian. Shfaqjet e planifikuara, të cilat festojnë 30-vjetorin e aktivitetit të saj, përfshijnë edhe një ndalesë në Sao Paulo, ku do të performojë nesër në stadiumin Morumbis dhe 50 takime në Amerikën Latine, më pas në Shtetet e Bashkuara dhe Kanada, nga tani deri në fund të qershorit.
Sipas Shakirës, turneu do të jetë më i rëndësishmi në karrierën e saj.
/Liberale.al/
