Chris Brown u arrestua sot në mëngjes në Manchester, Angli, pasi dyshohet se ka goditur producentin muzikor Abe Diaw me një shishe tekile në kokë gjatë një incidenti në një klub nate në Londër, më 2023.
Sipas Policisë Metropolitane, këngëtari 36-vjeçar u ndalua në një hotel luksoz dhe mbahet në paraburgim nën dyshimin për "shkaktim të dëmtimeve të rënda trupore."
Ngjarja ka ndodhur më 19 shkurt 2023, në një klub nate në Hanover Square, Londër. Producenti Abe Diaw paditi Brown në tetor 2023, duke e akuzuar për sulm fizik, ku këngëtari e goditi me një shishe tekile, më pas e shkelmoi dhe e goditi në qafë, duke e lënë pa ndjenja për 30 sekonda. Diaw gjithashtu e akuzon Brown për shpifje dhe dëmtim të reputacionit të tij.
Chris Brown nuk ka reaguar ende publikisht për ngjarjen.
Një histori me përsëritje
Chris Brown ka pasur disa përplasje me ligjin gjatë karrierës së tij 20-vjeçare.
Në vitin 2009, ai u shpall fajtor për sulm fizik ndaj ish-të dashurës së tij, Rihanna.
Në 2017, ish-e dashura tjetër, Karrueche Tran, siguroi një urdhër ndalimi pesë-vjeçar kundër tij, duke e akuzuar për kërcënime dhe sjellje agresive pasi ajo refuzoi t’i kthente dhuratat dhe paratë që ai i kishte dhënë gjatë lidhjes.
