Britney Spears është martuar me të fejuarin Sam Asghari, shtatë muaj pasi u lirua nga kujdestaria e të atit, për të cilën thoshte se e pengonte të martohej.

Çifti u martua në një ceremoni intime në Kaliforni të enjten. Por përgatitjet u ndërprenë kur Jason Alexander, i cili ishte martuar për një kohë të shkurtër me yllin e popit në vitin 2004, u arrestua pasi shkaktoi një incident.

Ai transmetoi video në Instagram Live para ceremonisë, me sa duket nga brenda shtëpisë së këngëtares. Videoja e tij e tregoi atë duke ecur nëpër shtëpi duke e kërkuar atë dhe më pas duke shkuar në një strehë ku ishte një ekspozitë e madhe me trëndafila. Ai pretendoi se Spears e kishte ftuar atë, duke thënë: "Ajo është gruaja ime e parë, gruaja ime e vetme".

Departamenti i Sherifit të Qarkut Ventura tha për agjencinë e lajmeve 'PA Media' se një grindje kishte ndodhur me oficerët e sigurisë dhe Alexander akuzohet për katër vepra penale.

"Ai arriti të futej në pronë dhe u përball me rojet e sigurisë," tha një zëdhënës i policisë.

Ceremonia u zhvillua më vonë të enjten, ku ishin të ftuar disa personazhe të njohur, si Madonna, Paris Hilton dhe Drew Barrymore. Donatella Versace dizejnoi fustanin e nusërisë, ndonëse asnjë foto nuk është publikuar.

Por babai, nëna dhe motra e Spears nuk ishin në dasmë, pasi marrëdhëniet e tyre u prishën për shkak të kujdestarisë.

Në nëntor, Spears,u lirua nga kujdestaria e diskutueshme ligjore 13-vjeçare, ku babai i saj Jamie kontrollonte shumë aspekte të jetës së saj.

Spears u takua me trajnerin personal, 28-vjeçarin Asghari në vitin 2016 në xhirimet e videoklipit të saj për këngën 'Slumber Party'.

Në një intervistë për BBC Persian, Asghari tha se martesa dhe planet për të pasur fëmijë "duhej të kishin ndodhur tre vjet më parë".

Përfaqësuesi i Asghari, Brandon Cohen, konfirmoi martesën e çiftit për agjencinë e lajmeve 'Associated Press' të enjten.

Ai tha: "Jam shumë i emocionuar që ka ardhur kjo ditë, dhe ata janë martuar. E di që ai e donte këtë për kaq shumë kohë. Ai është kaq i kujdesshëm dhe e mbështet në çdo hap."

Asghari është bashkëshorti i tretë i yllit. Pas Alexander, ajo ishte e martuar me Kevin Federline nga 2004 deri në 2007./Liberale.al