Një video që po qarkullon në rrjetet sociale ka shkaktuar shumë reagime, ku shfaqet presidenti francez Emmanuel Macron, i cili duket sikur goditet me shuplakë nga bashkëshortja e tij, Brigitte Macron, pasi mbërritën në Vietnam.

Në pamjet e videos, dera e avionit hapet dhe Macron shfaqet në hyrje. Në atë moment, duart e gruas së tij shihen duke u ngritur drejt fytyrës së tij, gjë që shumë media e kanë interpretuar si një shuplakë.

Presidenti Macron i mohoi lajmet për një grindje me gruan e tij, duke thënë se ata po bënin shaka me njëri-tjetrin dhe u kërkoi të gjithëve të mos e merrnin situatën seriozisht.

Ndërkohë, diplomacia ruse e shfrytëzoi momentin për të bërë ironi. Zëdhënësja e Ministrisë së Jashtme ruse, Maria Zakharova, komentoi me tone tallëse duke thënë:
"Ajo që është interesante nuk është videoja, por se çfarë do të shpikë këtë herë Pallati Elysee për të mbuluar këtë skandal."

Ajo shtoi me sarkazëm: "Zonja e Parë ndoshta donte ta përkëdhelte burrin, por e llogariti gabim forcën? Apo ndoshta po i jepte një shami dhe ai nuk e mori dot? Sugjerimi im: ndoshta ishte dora e Kremlinit."

Kjo video është transmetuar disa herë në mediat shtetërore ruse dhe është shndërruar në një temë diskutimi në mediat ndërkombëtare.