Presidenti i Shteteve të Bashkuara të Amerikës, Donald Trump njoftoi një armëpushim “të plotë dhe total” mes Izraelit dhe Iranit, që pritet të nisë brenda 6 orëve dhe të zgjasë fillimisht 12 orë.

Marrëveshja do të hyjë në fuqi në dy faza gjatë 24 orëve të ardhshme, me Iranin që nis armëpushimin i pari dhe Izraelin që e ndjek më pas.

Trump tha gjithashtu se pas 24 orësh do të shpallet fundi zyrtar i “Luftës 12-ditore”.

"URIME PËR TË GJITHË! Është rënë dakord plotësisht midis Izraelit dhe Iranit që do të ketë një ARMËPUSHIM TË PLOTË DHE TË PËRGJITHSHËM (rreth 6 orë nga tani, kur Izraeli dhe Irani të kenë përfunduar misionet e tyre të fundit në zhvillim!), për 12 orë, pas së cilës Lufta do të konsiderohet E PËRFUNDUAR!

Zyrtarisht, Irani do të nisë ARMËPUSHIMIN dhe, pas Orës së 12-të, Izraeli do të nisë ARMËPUSHIMIN dhe, pas Orës së 24-t, një PËRFUNDIM ZYRTAR i LUFTËS 12-DITORE do të përshëndetet nga e gjithë Bota. Gjatë secilit ARMËPUSHIM, pala tjetër do të qëndrojë PAQËSORE dhe ME RESPEKT. Duke supozuar që gjithçka do të shkojë siç duhet, dhe do të shkojë, dua të përgëzoj të dy Vendët, Izraelin dhe Iranin, për qëndrueshmërinë, guximin dhe inteligjencën që treguan për t’i dhënë fund asaj që duhet të quhet “LUFTA 12-DITORE.” Kjo ishte një luftë që mund të kishte zgjatur për vite me radhë, dhe të kishte shkatërruar të gjithë Lindjen e Mesme, por nuk ndodhi, dhe kurrë nuk do të ndodhë!

Zoti e bekoftë Izraelin, Zoti e bekoftë Iranin, Zoti e bekoftë Lindjen e Mesme, Zoti i bekoftë Shtetet e Bashkuara të Amerikës, dhe ZOTI E BEKOFTË BOTËN!"-shkruan Trump. 

Zëvendëspresidenti JD Vance e përgëzoi Trumpin për arritjen e marrëveshjes, ndërsa ende nuk ka reagime zyrtare nga Izraeli dhe Irani.