Gjykata e Lartë hodhi poshtë të mërkurën një përpjekje të administratës Trump për të ndëshkuar një gjykatës federal, që vendosi një afat të shpejtë për lirimin e miliarda dollarëve ndihma për jashtë.
Me një votim 5-4, gjykata i kërkoi gjykatësit Amir Ali që të sqaronte urdhrin e tij të mëparshëm, ku administratës republikane i kërkohej të lironte afro 2 miliardë dollarë ndihmë për punën që ishte bërë tashmë.
Megjithëse rezultati është një humbje afatshkurtër për administratën e Presidentit, Donald Trump, grupet jofitimprurëse dhe bizneset që e paditën janë ende duke pritur për paratë që thonë se u detyrohen. Një nga organizatat javën e kaluar u detyrua të pushonte nga puna 110 punonjës.
Është hera e dytë që administrata e re ka kërkuar dhe ka dështuar të bindë Gjykatën e Lartë që të frenojë menjëherë një gjykatës të një gjykate më të ulët në betejat ligjore mbi veprimet e ndërmarra nga Trump.
Gjyqtari Samuel Alito udhëhoqi katër gjyqtarë konservatorë, duke thënë se Aliut i mungon autoriteti për të urdhëruar pagesat. Alito shkroi se ai është i habitur që gjykata po shpërblen "një akt të mendjemadhësisë gjyqësore dhe vendos një gjobë prej 2 miliardë dollarësh për taksapaguesit amerikanë".
Veprimi i gjykatës lë në fuqi urdhrin e përkohshëm të ndalimit të Aliut që kishte pezulluar ngrirjen e shpenzimeve. Ali do të zhvillojë një seancë të enjten për të konsideruar një pauzë më të qëndrueshme.
Shumica vuri në dukje se administrata nuk kishte kundërshtuar urdhrin fillestar të Aliut, por vetëm afatin, i cili gjithsesi kaloi javën e kaluar.
Gjykata i tha Aliut që "të qartësojë se cilat detyrime duhet të përmbushë qeveria për të siguruar respektimin e urdhrit të përkohshëm të ndalimit, duke pasur parasysh mundësinë e çdo afati të pajtueshmërisë".
Shefi i drejtësisë John Roberts dhe gjyqtarja Amy Coney Barrett, dy konservatore, iu bashkuan tre gjyqtarëve liberalë për të formuar një shumicë.
Gjyqtarët Clarence Thomas, Neil Gorsuch dhe Brett Kavanaugh, iu bashkuan mospajtimit të Alitos.
Administrata Trump ka argumentuar se situata ka ndryshuar për shkak se ka zëvendësuar një ngrirje totale të shpenzimeve me përcaktime të individualizuara që çuan në anulimin e 5,800 kontratave të Agjencisë Amerikane për Zhvillim Ndërkombëtar dhe 4,100 granteve të tjera të Departamentit të Shtetit që arrijnë në rreth 60 miliardë dollarë ndihmë.
Qeveria federale ngriu ndihmën e huaj pas një urdhri ekzekutiv nga Trump që synonte ato që ai i quajti programe të kota që nuk korrespondojnë me qëllimet e tij të politikës së jashtme.
Padia që pasoi pretendoi se pauza shkel ligjin federal dhe ka mbyllur fondet edhe për programet më urgjente të shpëtimit të jetës jashtë vendit.
Ali urdhëroi që fondet të rivendoseshin përkohësisht më 13 shkurt, por gati dy javë më vonë ai zbuloi se qeveria nuk po jepte asnjë shenjë për t'u përmbushur dhe vendosi një afat kohor për të liruar pagesën për punën tashmë të përfunduar.
Administrata apeloi, duke e quajtur urdhrin e Aliut "tepër ndërhyrës dhe thellësisht të gabuar" dhe duke protestuar për afatin kohor për lirimin e parave. AP
