Koreja e Veriut ka dënuar ashpër projektin amerikan për krijimin e një mburoje raketore të avancuar, të quajtur “Kupola e Artë”, duke paralajmëruar se një zhvillim i tillë mund të transformojë hapësirën në një skenë të mundshme konflikti bërthamor.

Sipas mediave shtetërore të Penianit, Ministria e Jashtme e konsideroi këtë projekt si një shfaqje të arrogancës dhe vetëbesimit të tepruar nga ana e SHBA-së. Programi, i promovuar nga ish-presidenti Donald Trump dhe që pritet të finalizohet deri në fund të mandatit të tij, ka si synim të neutralizojë kërcënimet ajrore të nivelit të ardhshëm, përfshirë raketat balistike dhe ato të lundrimit.

Peniani e akuzoi Uashingtonin se po përpiqet të militarizojë hapësirën, duke e cilësuar këtë plan si një hap drejt një gare të re armatimesh bërthamore dhe hapësinore. Koreja e Veriut, që e konsideron SHBA-në armik, ka qenë kritike e vazhdueshme ndaj stërvitjeve të përbashkëta ushtarake mes SHBA-së dhe Koresë së Jugut.

Sipas analistit Hong Min nga Instituti Korean për Unifikimin Kombëtar, Peniani e sheh “Kupolën e Artë” si një kërcënim potencial për aftësitë e tij bërthamore dhe, në rast se projekti amerikan përmbyllet, ai paralajmëron se Koreja e Veriut mund të kërkojë mënyra të reja për ta kapërcyer apo neutralizuar atë.

Në vitin 2022, Kim Jong Un miratoi një ligj që e shpall vendin si shtet me armë bërthamore dhe prej atëherë ka intensifikuar testimet raketore. Edhe Kina ka reaguar negativisht ndaj projektit, duke e quajtur “Kupolën e Artë” një iniciativë me qëllime të qarta ofensive që ngjall shqetësim serioz në rajon.