Një grup prej 59 jugafrikanësh të bardhë ka mbërritur në SHBA, ku do të marrin statusin e refugjatëve.
Presidenti Donald Trump ka thënë se aplikimet për refugjatët e pakicës Afrikaner nga Afrika e Jugut janë përshpejtuar pasi ata janë viktima të "diskriminimit racor".
Qeveria jugafrikane ka thënë se grupi nuk po përjeton asnjë persekutim të tillë që do të justifikonte statusin e refugjatëve.
Administrata Trump ka pezulluar pranimin e të gjithë refugjatëve të tjerë, përfshirë ata që vijnë nga zonat e luftës. Human Rights Watch e ka quajtur këtë veprim një kthesë të egër racore, duke thënë se mijëra njerëz - shumica të zeza dhe refugjatë afganë - janë refuzuar për strehim në SHBA.
Grupi i jugafrikanëve të bardhë, të cilët mbërritën në aeroportin Dulles pranë Washington DC të hënën, morën një pritje të ngrohtë nga autoritetet amerikane.
Disa prej tyre mbajtën fëmijë të vegjël dhe valëvitën flamuj të vegjël amerikanë në zonën e mbërritjes, e cila ishte e zbukuruar me balona të kuqe, të bardha dhe blu.
Procesimi i refugjatëve në SHBA shpesh merr muaj, madje vite, por ky grup ka kaluar shpejt në këtë proces. UNHCR - Agjencia e Kombeve të Bashkuara për Refugjatët - konfirmoi për BBC-në se nuk ka qenë e përfshirë në verifikimin e tyre, ashtu siç ndodh zakonisht.
Përgjigjur direkt të hënën kur u pyet se pse aplikimet e refugjatëve Afrikaner u përpunuan më shpejt se grupet e tjera, Trump tha se po ndodhte një "gjenocid" dhe se "fermerët e bardhë" ishin të veçuar si target.
"Fermerët po vriten, ata janë të bardhë, por nuk ka rëndësi nëse janë të bardhë apo të zi," tha ai.
Por Presidenti i Afrikës së Jugut, Cyril Ramaphosa, tha se i kishte thënë Trumpit gjatë një bisede telefonike se vlerësimi i SHBA për situatën "nuk është i vërtetë".
"Një refugjat është dikush që duhet të largohet nga vendi i tij nga frika e persekutimit politik, fetar ose ekonomik," tha Ramaphosa. "Dhe ata nuk i përmbushin këto kushte."
Në përgjigje të një pyetjeje nga BBC në aeroportin Dulles, Nënsekretari i Shtetit Christopher Landau tha: "Nuk është befasi, për fat të keq, që një vend nga i cili vijnë refugjatët nuk pranon se ata janë refugjatë."
SHBA ka kritikuar politikën e brendshme të Afrikës së Jugut, duke akuzuar qeverinë për konfiskimin e tokave nga fermerët e bardhë pa asnjë kompensim.
Në janar, Presidenti Ramaphosa firmosi një ligj të diskutueshëm që i lejon qeverisë të konfiskojë tokë të pronës private pa kompensim në disa rrethana, kur e konsideron "të drejtë dhe në interesin publik."
Por qeveria thotë se nuk është konfiskuar ende asnjë tokë nën këtë akt.
Ka pasur frustrim në Afrikën e Jugut për ritmin e ngadaltë të reformës tokësore gjatë tri dekadave që nga fundi i sistemit racist të apartheidit.
Ndërkohë që afrikano-jugorët e zinj përbëjnë më shumë se 90% të popullsisë, ata zotërojnë vetëm 4% të të gjithë tokës private, sipas një raporti të vitit 2017.
Një nga këshilltarët më të afërt të Trump, Elon Musk, i lindur në Afrikën e Jugut, ka thënë më parë se kishte një "gjenocid të njerëzve të bardhë" në Afrikën e Jugut dhe ka akuzuar qeverinë për kalimin e "ligjeve racistë të pronësisë".
