Ekrem Imamoglu u emërua zyrtarisht si kandidat presidencial nga partia opozitare CHP për zgjedhjet e vitit 2028, tha një zëdhënës i partisë për AFP të hënën.

Partia Popullore Republikane (CHP) – partia kryesore e opozitës dhe partia e dytë më e madhe në parlament – mbajti zgjedhjet paraprake të dielën, në të cilat kandidati i vetëm ishte Imamoglu, rivali kryesor politik i Presidentit Recep Tayip Erdogan.

Imamoglu u arrestua, u mor në pyetje, u burgos dhe u hoq nga posti i kryetarit të bashkisë në më pak se një javë pas një hetimi për korrupsion dhe terror që opozita e ka cilësuar si një “grusht shteti” politik.

Ndërkohë, ministri i Brendshëm i Turqisë, Ali Yerlikaya, ka bërë me dije se gjithsej 1 mijë e 133 janë arrestuar që nga fillimi i protestave në Turqi javën e kaluar.

“Terrorizimi i rrugëve tona dhe kërcënimi për paqen dhe sigurinë e kombit tonë absolutisht nuk do të tolerohet”, ka shkruar ai në një postim të gjatë.

Në përgjigje të arrestimit të tij, u pa një shpërthim i trazirave më të këqija që vendi ka parë në më shumë se një dekadë – me protestues të qëlluar me gaz lotsjellës dhe plumba gome.

Imamoglu tha se akuzat kundër tij janë të motivuara politikisht. “Nuk do të përkulem kurrë”, shkroi ai në X para se të lihej në paraburgim.