Të hetohet çdo parregullsi

Ambasadori i Bashkimit Europian, Luigi Soreca shprehet se institucionet shqiptare duhet të monitorojnë me kujdes çdo akuzë dhe ankese për parregullsi, ndrërsa në vend vazhdojnë polemikat mbi rezultatet e zgjedhjeve. PS ka nisur të mbajë fjalime dhe të shpalosë projekte, Basha përsërit se nuk do t’i njohë

Për ambasadorin e Bashkimit Europian Luigi Soreca zgjedhjet u zhvilluan në mënyre të rregullt. Por në një intervistë për Euroneës Albania ai përmend nominalisht institucionet shqiptare që duhet të monitorojnë me kujdes çdo akuzë dhe ankese për parregullsi.

“Pas zgjedhjeve janë këto diskutime, ankesa dhe akuza për blerje votash dhe parregullsi. Ne duam që autoritetet kompetente, ato të drejtësisë, SPAK, KQZ dhe KAS të shohin çdo parregullsi,” – tha Soreca, – “Duhet të kemi parlament të plotë për të pasur rrugëtim legjitim të Shqipërisë drejt BE-së”.

Përveç diskutimeve të fushatës, për anëtarësimin në BE, sipas Ambasadorit Soreca, drejtuesit politikë duhet të kalojnë të faktet.

“Presim që partitë qoftë qeverisëse, apo opozitare të bëjnë veprimet e duhura për të ndihmuar anëtarësimin,” – vijoi Soreca.

Soreca ndodhet në turin e tij nëpër Shqipëri në kuadër të javëve evropiane, gjatë të cilit njeh qytetarët shqiptarë me investimet e BE-së.

“Vetëm në vitin e shkuar, gjatë krizës së pandemisë, BE ka investuar 230 milionë euro, përveç qindra milionëve që kemi shpenzuar dhe dhuruar për Shqipërinë në 20 vitet e fundit,” – u shpreh ambasadori i BE-së.

Sipas ambasadorit Soreca të gjitha këto para janë përdorur në projektet që po i tregon gjatë një turi nëpër Shqipëri në kuadër të javës së Evropës.

Situata

Kryetari i Partisë Demokratike, Lulzim Basha, përsëriti dje me vendosmëri se opozita nuk do të njohë kurrë rezultatin e zgjedhjeve të përgjithshme të 25 prillit, sepse ato ishin një masakër elektorale nga ana e socialistëve.

Basha tha se socialistët vodhën, blenë dhe manipuluan vullnetin politik të qytetarëve shqiptarë, duke sjellë një degjenerim të thellë të institucioneve demokratike dhe jetës politike.

KQZ vazhdon të shqyrtojë ankesat e partive të opozitës për manipulim të zgjedhjeve, ndërsa socialistët po shfaqen në takime pune, duke thënë se për ta fitorja e mandatit të tretë është temë e mbyllur.

Edhe nga Fieri, ashtu si nga Durrësi e qytete të tjera, ku po zhvillon një tur tubimesh me përkrahës të opozitës, kryetari i Partisë Demiokratike, Lulzim Basha, deklaroi se socialistët i vodhën dhe i blenë këto zgjedhje dhe se rezultatet e tyre nuk do të njihen kurrë.

Ai tha se socialistët dhe social-demokratët të lidhur me bandat kriminale kërcënuan dhe frikësuan votuesit, shfrytëzuan burimet shtetërore, blenë vota për qeverinë dhe shtrembëruan vullnetin e qytetarëve, që nuk votuan të lirë.

“Masakra elektorale e 25 prillit nuk do të njihet. Rezultati i tjetërsimit të vullnetit të shqiptarëve, nuk do të pranohet. Për këtë nuk ka pikë diskutimi. Beteja do të vazhdojë, jo për karrigen time, jo për poste drejtorësh apo për tendera, apo për të hapur dyert e doganave për kontrabandë apo për të bërë aleancë me krimin. Beteja jonë do të vazhdojë për shqiptarët, për prindërit që duan t’i rrisin e t’i mbajnë fëmijët këtu. Beteja jonë do të vazhdojë në të gjitha format, në të gjitha mënyrat, në çdo fushë beteje. Fundi i kësaj beteje do të jetë përmbysja e regjimit Rama-Doshi” – tha zoti Basha.

Në zgjedhjet e përgjithshme të 25 prillit, sipas rezultateve nga KQZ-ja, në parlamentin me 140 vende Partia Socialiste fitoi 74 mandate, Parti Demokratike fitoi 59 mandate, aleatja tjetër e saj, Lëvizja Socialiste për Integrim mori 4 mandate, ndërsa Partia Social-Demokrate fitoi 3 mandate dhe u shpreh e gatshme të bashkëpunojë me socialistët. Parlamenti i ri mblidhet në shtator.

Partia Socialiste ndërkohë ka nisur të mbajë fjalime dhe të shpalosë projekte investimedh gjatë mandatit të tretë.

Përfaqësues të saj i kanë hedhur poshtë akuzat për blerje votimesh, duke pohuar se e majta fitoi një mandat të tretë për të qeverisur vendin, pasi tregoi aftësi në menaxhimin e dy krizave të rënda ekonomike të pandemisë dhe të tërmetit, duke fituar besimin e qytetarve për të vazhduar punën.

Madje Partia Socialiste e ka ftuar Partinë Demokratike që të bashkëpunojnë për reforma me rëndësi për të ardhmen e vendit.

“Ne jemi këtu për të vënë një theks shumë të fortë tek domosdoshmëria e kalimit në një fazë tjetër të përpjekjes së përbashkët për të vendosur kontroll absolut mbi territorin në aspektin e mbrojtjes së tij nga ndërhyrjet dhe aktivitetet e paligjshme” – tha sot kryeministri Edi Rama në një mbledhje me drejtues të lartë të policisë.

Në KQZ vazhdojnë të shqyrtohen kërkesat e opozitës. Në KQZ është kërkuar përsëritja e zgjedhjeve në 9 nga 12 qarqe të Shqipërisë, ndërsa në gjithë prokuroritë e vendit janë 180 padi për këto krime para dhe pas ditës së zgjedhjeve.

Bashkësia ndërkombëtare, SHBA dhe BE, u bënë thirrje forcave politike dhe udhëheqësve të tyre që të pranojnë vendimin e votuesve, duke shpresuar në respektimin dhe certifikimin e rezultateve dhe funksionimiin efektiv të institucioneve demokratike të vendit, që dalin nga këto zgjedhje.

Përfaqësues diplomattikë nga Uashingtoni dhe Brukseli theksuan se mbështesin raportin paraprak të OSBE/ODIHR-it, sipas të cilit, zgjedhjet ishin të mirorganizuara nga administrata zgjedhore, fushata ishte gjithëpërfshirëse dhe dita e zgjedhjeve ishte e qetë.

Vëzhguesit ndërkombëtarë të zgjedhjeve theksuan se partia në pushtet përdori burimet qeveritare në fushatë, ndërsa nëpunësit e administratës, sipas tyre, patën presione dhe stimuj për të mbajtur anën e qeverisë.

OSBE/ODIHR po përgatit një raport të plotë mbi zgjedhjet, ndërsa në raportin paraprak theksoi se procesi zgjedhor rezultoi të ishte i suksesshëm në përgjithësi, ndonëse vëzhguesit morën shumë pretendime për shitblerje votash, të cilat po hetohen. Ata dënuan tensionimet dhe vrasjen e një personi në Elbasan dhe plagosjen e disa të tjerëve disa ditë para votimit.

Përgjigja për kritikët

Nga Fieri, ku zhvilloi një takim me strukturat e Partisë Demokratike, Lulzim Basha komentoi edhe zërat kritik ndaj tij brenda PD-së, pas zgjedhjeve të 25 prillit.

Basha u shpreh se PD-ja është një shtëpi e madhe ku nuk ka njerëz të tepërt. Ai u shpreh se të gjithë në PD duhet të jenë mendjehapur ndaj çdo ideje mendimi dhe kritike konstruktive.

“Partia Demokratike ka lindur si një parti e lirisë dhe kjo na ka mbajtur një parti të madhe edhe në kohë të vështira, dhe kjo na ka zmadhuar edhe më shumë në betejën tonë për t’u kthyer shqiptarëve shpresën dhe për të luftuar dhe punuar për ta. Ne jemi pra, një shtëpi e madhe ku nuk ka njerëz të tepërt. Pa diskutim, gjithsecili ka mendimet e veta, ka qëndrimet e veta, ka idetë e veta, gjithsecili këtu ka kontributin tuaj, investimin tuaj, sakrificën tuaj personale dhe jo vetëm, gjithsecili prej nesh ka dhe të metat dhe gabimet e veta nga i pari tek i fundit. Ndaj, le të jemi konstruktiv dhe mendje hapur ndaj çdo ideje mendimi dhe kritike konstruktive.

Ju të gjithë jeni eksoficio anëtarë të Kuvendit Kombëtar. Ju i keni shkruar rregullat më demokratike që ka një parti politike në Shqipëri dhe në Ballkan. Ju e dini fare mirë se pushteti për të zgjedhur ata që ju përfaqësojnë dhe ju drejtojnë kanë qenë në dorën tuaj dhe së shpejti do të jetë prapë në dorën tuaj, vendimi do të jetë i juaji. Por tani gjëja më e rëndësishme është të shohim njëri-tjetrin në sy dhe pasi ta ndajmë vështrimin, mos të kemi asnjë pikëpyetje se ku qëndrojmë.

Zgjedhjet nuk do të njihen, objektivi ynë politik është rrëzimi një orë e më parë i regjimit Rama-Doshi, me të cilin nuk do të ketë asnjë bashkëpunim, por vetëm betejë, asnjë minutë paqeje deri në shporrjen e tij dhe deri në kthimin Shqipërisë shqiptarëve”, u shpreh Basha.

KAS “ngec” edhe në Berat. PD, akuza Rusmalit për mbështetje ndaj Edi Ramës

As për Qarkun e Beratit nuk pati një vendim mbi ankimet e bëra nga opozita. Pesë anëtarët e KAS kërkuan më shumë kohë për të parë provat e paraqitura nga palët ankimuese. Mbledhja u shoqërua me akuza për mbështetje politike të anëtarëve të Komisionit ndaj Partisë Socialiste.

Komisioni i Ankimeve dhe Sanksioneve (KAS) nuk mundi të marrë një vendim për rezultatin e Qarkut të Beratit. Orët e gjata të mbledhjes nuk prodhuan rezultat mbi kërkesat ankimore të PD-së dhe LSI-së për të shpallur të pavlefshëm rezultatin në Qarkun e Beratit, por vetëm akuza politike ndaj anëtarëve të KAS.

Partia Demokratike parashtroi akuzat e saj për blerje votash, duke pasur si bazë paditë e bëra në SPAK dhe kërkoi nga KAS të marrë informacione nga Prokuroria e Posaçme.

Marash Logu u shpreh: “PD nuk është as polici, as prokurori. Cila është arsyeja që ju refuzoni të merrni këto prova?”.

Ilir Rusmali u përgjigj: “Do ta bëj edhe këtë pyetje”.

Logu kundërpërgjigjet: “Jo, nuk e bëni se dje votuat kundër kërkesës sonë”.

LSI pretendon se brenda kutive të Beratit është fshehur mandati i saj, të cilin e humbi për një grusht votash, duke i konsideruar si tendencioze pyetjet e anëtarëve të KAS: “A mund të bëni një kuantifikim të këtyre numrave që ju sollët, janë 100 apo janë 1000?”

Altin Kaziaj tha: “Duhen 77 vota dhe norma lexohet në frymën e ligjvënësit dhe jo në interesa të caktuara”.

Provat e paraqitura nga palët u cilësuan të pavlefshme nga përfaqësuesi i PS-së në KQZ, duke etiketuar pretendimet si një farsë proceduriale. Eridina Salianji theksoi: “Pjesë e këtyre grupeve të numërimit janë edhe anëtarët e opozitës. Këtu nga një fjalim po kthehet në një teatër”.

Situata e krijuar u shfrytëzua për ngacmime në adresë të anëtarit Rusmali, dikur eksponent i demokratëve. Por, Rusmali tha: “Të mos bëjmë komente për njëri-tjetrin. Nuk ka nevojë që nën emërtimin prapsim të përsëriten ndërhyerjet e bëra edhe një herë tjetër. Se nuk është në rastin tonë “përsëritja, mëmë e dijes”, është mëmë e bezdisë”.

“Ju, zoti Rusmali, kërkuat që të mos kalojmë në përsëritje dhe bezdisje. Partia Demokratike të mos kalojë, Partia Socialiste të kalojë në përsëritje”, u shpreh Logu.

Ashtu si në rastin e ankimeve për Gjirokastrën, KAS nuk mundi të merrte vendim dhe mbledhja u shty për të vijuar në fundjavë./Gazeta Liberale

Tags: berat, gazeta liberale, hetim, kas, luigi soreca, parregullsi, zgjedhje