Ministria e Brendshme publikoi sot listën përfundimtare të qytetarëve me të drejtë vote në zgjedhjet parlamentare të 11 majit 2025. Zgjedhjet e 11-ta parlamentare pas rënies së komunizmit (dy të parakohshme) do të jenë historike për faktin se për herë të parë do të votojnë shqiptarët në emigracion. Nëse fiton partia që ka aktualisht pushtetin dhe për më tepër sondazhet e nxjerin sërish fituese, do të jetë hera e katërt radhazi që një parti siguron fitoren, çka mund të përbënte një rekord jo vetëm në Shqipëri, por në mbarë rajonin e Ballkanit Perëndimor.
Shifrat tregojnë se nga diaspora ku ndodhet gati gjysma e votuesve janë regjistruar një numër relativisht i ulët ( 245 mijë nga rreth 1.6 milionë), dhe ata votues janë nxitur më së shumti nga dy partitë e mëdha çka do të thotë se dypolariteti nuk rrezikon shembjen. PS ka qenë më aktive në diasporë çka i jep një tjetër avantazh konkurues karshi kundërshtarit.
Nga të dhënat e gjeneruara nga Drejtoria e Përgjithshme e Gjendjes Civile të drejtën e votës më 11 maj 2025 e kanë 3,713,761 shtetas shqiptarë, brenda e jashtë vendit, ndër ta 114,642 zgjedhës votojnë për herë të parë. Numri i emigrantëve të regjistruar zyrtarisht në listën e zgjedhësve nga jashtë është 245,808 persona. Ndërkohë që vlera e shpenzimeve për votimet që i është besuar postës DHL është llogaritur tek 9.2 milion Euro.
Në zgjedhjet e 2021, sipas Komisionit Qëndror të Zgjedhjeve, 3,588,869 shtetas shqiptarë me të drejtë vote u regjistruan automatikisht në listat e votuesve, ku përfshiheshin të gjithë personat me shtetësi shqiptare, pra edhe ata që jetojnë jashtë vendit por që nuk mund të votonin për shkak të emigracionit.
107,024 të rinj kishin të drejtën e votës për herë të parë në 25 prill 2021, shifër kjo që njeh një rritje të lehtë në zgjedhjet e 11 majit 2025, për shkak të diasporës. Por siç treguan zgjedhjet e kaluara kjo është grupmosha që i refuzon më së shumtë votimet.
Për zgjedhjet e 25 qershorit 2017 kur PS mori mandatin e dytë radhazi dhe të parin duke garuar e vetme, ishin të regjistruar me të drejtë vote 3.452.260 zgjedhës, bazuar mbi të dhënat e regjistrit kombëtar elektronik.
Pjesëmarrja në zgjedhjet e vitit 2013 ishte 53% ndërsa më 2017 ishte 47% dhe 46.2 në zgjedhjet e 2021.
PS mori 74 mandate në zgjedhjet e 2017 dhe 2021 por edhe pse u nda në numër të barabartë mandatesh në dy zgjedhjet e fundit parlamentare shënoi një rritje të lehtë votuesish.
E ndërsa numri i qytetarëve me të drejtë vote mbetet gati i njëjtë në tre zgjedhjet e fundit pavarësisht përfshirjes së diasporës dhe mundësisë historike që i është për të votuar më 11 maj, surprizat e mundshme duken ndoshta larg, për të thyer makinerinë e votave të PS-së (humbjet e votave nga të zhgënjyerit i kompenson me ato që prodhon pushteti qoftë edhe në ditën e fundit), ndërsa forcat kryesore opozitare duket sikur ende po vuajnë pasojat e përçarjes dhe të refuzimit për të pranuar domosdoshmërinë e reformimit që sjell koha. Të paktën me zhvillimet kur duhen edhe pak ditë nga fillimi zyrtar i fushatës, humbja e mundshme e pushtetit nga PS duket një opsion shumë larg të mundshmes.
