Detaje të reja janë zbuluar nga vrasja e Ilaria Sulës, 22-vjeçares shqiptare në Itali. Ajo u godit me thikë nga ish i dashuri i saj, filipinasi Mark Antony Samson.
Ky i fundit rrëfeu para policisë në Romë se i mori jetën shqiptares dhe më pas u përpoq ta fshihte ngjarjen duke futur trupin e saj të pajetë në valixhe dhe duke e hedhur në një humnerë.
Sipas rindërtimit të dinamikës së ngjarjes, policia thotë se krimi ka ndodhur në apartamentin e tij, në rrugën Homs ku jetonte me prindërit. Ata janë nën hetim, pasi qëllimi i hetuesve është të qartësojnë nëse ata kanë patur ndonjë rol në ngjarjen tragjike.
I riu ka thënë vetëm “më vjen keq për çfarë kam bërë”, por asgjë sa i përket motivit të vrasjes. Dyshimet janë se ngjarja mund të ketë ndodhur natën që ajo është zhdukur, më 25 Mars. Paraprakisht dyshohet për një krim pasioni. Por hetuesit po punojnë për të gjetur prova të mundshme që flasin për një vrasje të paramenduar.
Pasi i mori jetën vajzës me të cilën kishte pasur një lidhje romantike prej muajsh, 23-vjeçari filipinas e futi trupin e saj në një valixhe dhe e çoi në makinë. Nga aty shkoi në zonën e Polit, një qytet rreth 40 kilometra larg Romës.
Aty e hodhi në një humnerë. Më pas u kthye në kryeqytetin italian ku fillimisht hodhi thikën në një kazan plehrash dhe celularin e viktimës në një pusetë. Me anë të telefonit të Ilarias, 23-vjeçari u përpoq që të çonte në drejtimin e gabuar hetimet. Ai fshiu profilet sociale të viktimës dhe dërgoi mesazhe drejt miqve dhe familjes së saj.
Ishte celulari i 22-vjeçares që drejtoi policinë në shtëpinë e autorit në rrugën Homs. Ata po këqyrin tashmë imazhe nga kamerat e sigurisë që mund të kenë filmuar të riun teksa përpiqej të hidhte trupin e pajetë.
E teksa familjarët e Ilaria Sulës kërkonin dëshpërimisht vajzën, Mark Antony Samson ka bërë disa veprime tinëzare. Ai është përpjekur që të heqë dyshimet mbi veten duke pyetur shoqet e Ilarias se ku ishte ish e dashura e tij. Jo vetëm kjo, por ai i ka dërguar mesazhe të ndryshme atyre duke menduar se do besonin se ishte ende gjallë dhe se do kthehej shpejt në shtëpi.
“Ilaria me shumë mundësi ka qenë e vdekur kur ne u shqetësuam se nuk po e gjenim dot. Shoqet e saj e panë për herë të fundit të martën. E njihja atë [autorin], ishin bashkë për një vit, por u ndanë”, tregon i vëllai i viktimës, Leoni.
Në ditët e fundit, 23-vjeçari ishte takuar edhe me prindërit e vajzës. Babai i Ilarias, Flamuri tregoi për një emision italian se madje ai e ka përqafuar.
“E takuam në stacionin policor të dielën, nuk e dinim se ishte ndarë. Na tha se i vinte keq dhe se ishte i shqetësuar për zhdukjen e saj. Dukej i qetë, madje më dha një përqafim”, tha ai.
Flamur Sula tregon edhe momentet kur ka folur për herë të fundit me të bijën, por ishte i bindur që mesazhet nuk ishin nga ajo.
“Shkroi “Paçim ba”, mos u shqetësoni, jam mirë. Jam larguar me një djalë dhe një vajzë. Do të kthehem në Terni për një muaj. Me pas vijonte të thoshte, mos u shqetësoni, jam mirë. Kjo na bëri dyshues sepse nëse do ishte vajza jonë, do na shkruante”, është shprehur ai.
