Një i mitur, përkatësisht i moshës 15 vjeç, është nën hetim pasi dyshohet se ka ndërhyrë në mënyrë të paautorizuar në sistemet kompjuterike të disa institucioneve shtetëore.
Rasti u zbulua në Vlorë nga operacioni i zhvilluar “The Accountant”, pas 1 muaj hetime.
Nga hetimet u provuia se 15-vjeçari, në muajin Mars 2025, ka ndërhyrë në email-et dhe faqet zyrtare të disa institucioneve shtetërore, duke ndërprerë kështu funksionimin e tyre për periudha të caktuara.
Ndërkaq, uniformat blu bëjnë më dije se nuk rezulton që i mituri të ketë kryer vjedhje të të dhënae apo dokumenteve konfidenciale nga këto sisteme.
Janë sekuestruar disa pajisje, si 5 laptopë, 6 celularë dhe 1 dronë, të cilat do shërbejnë si material prove.
Prokuroria e Vlorës vijon hetimet për dokumentimin e plotë të kësaj ngjarje.
Njoftimi i Policisë:
DVP Vlorë
Finalizohet operacioni “The Accountant”, goditet një rast i ndërhyrjes së paautorizuar në sistemet kompjuterike të disa institucioneve shtetërore.
Identifikohet, pas një hetimi 1-mujor me metoda speciale, dhe vihet në hetim një i mitur si autor i dyshuar.
Sektori i Hetimit në Drejtorinë Vendore të Policisë Vlorë, nën drejtimin e Prokurorisë pranë Gjykatës së Juridiksionit të Përgjithshëm Vlorë, dhe me mbështetjen e Drejtorisë së Hetimit të Krimeve Kibernetike në Departamentin e Policisë Kriminale në DPPSH dhe Shërbimit Informativ Shtetëror, Dega Vlorë, finalizuan me sukses operacionin policor të koduar “The Accountant”.
Ky operacion u zhvillua pas një hetimi intensiv njëmujor, të ndjekur me metoda speciale hetimi, në kuadër të goditjes së krimeve kibernetike.
Si rezultat i hetimeve, u dokumentua veprimtaria e kundërligjshme e një shtetasi të mitur 15 vjeç, banues në Vlorë, i cili dyshohet se gjatë muajit mars 2025 ka ndërhyrë në mënyrë të paautorizuar në të dhënat kompjuterike të disa institucioneve shtetërore (email-e dhe faqe zyrtare), duke shkaktuar ndërprerjen e funksionimit të tyre për periudha të caktuara kohore.
Nga hetimet e deritanishme nuk ka rezultuar vjedhje të të dhënave apo dokumenteve konfidenciale nga këto sisteme.
Gjatë operacionit u sekuestruan disa pajisje, të cilat do t’i nënshtrohen ekzaminimeve të thelluara teknike, konkretisht: 5 kompjuterë laptop, 6 aparate celularë dhe 1 dron.
Vijojnë hetimet për dokumentimin e plotë të kësaj veprimtarie.
