Më 5 prill, Shqip Hop Fest sjell për herë të parë në Shqipëri The Game, me performanca nga Elai, Ronela Hajati, West Side Family. Sheshi Skënderbej do të kthehet në epiqendrën e hip-hopit, teksa legjenda botërore The Game, do të performojë për herë të parë në Shqipëri, në kuadër të turit të tij global, për 20-vjetorin e albumit ikonik. I ftuar në studion e “Live From Tirana” për të folur më shumë për këtë event, ka qenë Land Hysi nga West Side Family, që do të hapin shfaqjen e Shqip Hop Fest para se The Game të vijë në skenë. Landi na ka treguar më shumë për këtë festival dhe çfarë të presim…

Si e shikon këtë kohë sot, ku më shumë po i jepet vëmendje dikujt që nuk prodhon muzikë të mirë, persona që bëjnë më shumë para, por harrohen më shpejt? Ndërkohë hitet e West Side Family mbahen mend akoma…

"Për ne atëherë një pëlqim vlente shumë më tepër se një like apo koment i kohëve të tanishme, sepse trajtimi dhe ndjesia që ti përfitoje atëherë është shumë e pashpjegueshme në krahasim me tani. Jemi këtu sepse kemi një publik që na ka mbështetur, akoma na mbështet, pavarësisht kohës që kalon. Ka qenë një marrëdhënie, kemi marrë dhe kemi dhënë energji pozitive. Të gjithë fokusin e kemi pasur se si të kthejmë mbrapsht këtë të mirë që ne po përjetojmë."

"Asnjëherë West Side Family nuk e ka shfrytëzuar famën për lek. Duhet ta kishte shfrytëzuar edhe për lek, por nuk e ka shfrytëzuar. Nuk e kemi trajtuar kështu. Ka qenë talenti i rrallë dhe i pashoq i Dr. Florit, që unë besoj se po të ishte sot, do të frymëzonte dhe do të sillte shumë prurje të reja dhe të bukura nisur nga realiteti shqiptar. Ajo që unë shoh, është se këngët sociale i mungojnë tregut në përgjithësi. Ne nuk kemi abuzuar me famën, nuk kemi dashur famë, kemi dashur një marrëdhënie të vazhdueshme dhe të qëndrueshme me publikun. Këtë e kuptoj shumë vite më mbrapa pasi e kemi bërë. Në momentin që ne fituam me këngën “Mesazh”, falë tekstit të shkëlqyer të Dr. Florit, ne e pamë si mundësi që qenkemi një grup i ardhur nga bankat e shkollës por paskemi një të ardhme, na vlerësojmë. E gjithë përpjekja pastaj ishte si të ruajmë respektin, jo t’i hedhim hi syve publikut, ta gënjejmë. Unë e kam shumë të rëndësishme që të eci në rrugë dhe të marr një buqëqeshje, një shikim vlerësues, respekt. Nuk e kemi bërë për të blerë publikun, e kemi bërë për t’i fituar zemrën publikut dhe për t’i dhënë zemrën tonë. Kjo është ajo lloj energjie për të cilën ne kemi investuar. A mund ta kishim shfrytëzuar më mirë për para? Patjetër që po, por ajo kostoja e parasë nuk do na shpëtonte dhe të na fuste në Forbes si njerëzit më të pasur", tha Landi.