Arti dhe kinematografia shqiptare sot është në zi. Artisja e njohur Margarita Xhepa u nda nga jeta këtë të enjte në moshën 91-vjeçare.

Si homazh për jetën e saj profesionale dhe atë personale, emisioni “Rudina” risjell në ekranin e Televizionit Klan një intervistë të para 11 viteve.

Një intervistë nga Rudina Magjistari që prek çdo aspekt të jetës së artistes së madhe shqiptare. Me qindra role në teatër dhe kinematografi, duket se asgjë nuk ka ngelur pa u interpretuar nga Margarita Xhepa. Në një rrëfim të sinqertë artisja tregonte pengun e jetës.

Nënë e 3 djemve, secili i suksesshëm në rrugën dhe profesionin që ka zgjedhur, artistja shprehej se do të donte shumë që të kishte pasur edhe një vajzë.

Rudina Magjistari: Ju keni 3 djem dhe bashkëshorti juaj ka qenë një ndihmë shumë e madhe në mënyrë që të arrinit ta përballonit të gjithën edhe ta realizonit misionin tuaj profesional me sukses ashtu siç në fakt keni bërë. Pa mbështetjen e një bashkëshorti të mirë, që ju e keni pasur, është e pamundur në fakt, duke pasur 3 djem të cilët sot janë të rritur, secili i suksesshëm në punën e vet. Njëri është poet shkruan, Ndriçimi që është aktor dhe i treti është mjek. Pra duhet të jeni shumë krenare për djemtë tuaj.

Margarita Xhepa: Unë, bashkëshorti im dhe të gjithë njerëzit e dashur që na rrethojnë, jemi shumë krenarë për djemtë, sepse në të vërtetë i kemi rritur të 2 bashkë me vështirësi, por na nderuan. Kjo është gjëja më e bukur.

Rudina Magjistari: E keni peng që nuk e keni një vajzë?

Margarita Xhepa: Shumë! E kam shprehur këtë punën e pengut sepse vajza është muzikaliteti, është poezia e familjes, është qetësuesja do thojë. Por është dhe një ndihmë për nënën, por siç duket nuk u krijua ky fat dhe kjo kënaqësi./tvklan.al