Presidenti i SHBA-së, Donald Trump ka shprehur mbështetje për politikanen kontroverse franceze të krahut të djathtë, Marine Le Pen, pasi ajo u dënua për përvetësim të fondeve publike dhe iu ndalua pjesëmarrja në politikë.
Në mediat sociale, Trump rastin e Le Pen e quajti “gjueti shtrigash”, të njëjtën frazë që ai e përdori për të kritikuar hetimet e shumta dhe çështjet gjyqësore kundër tij, si dhe shkroi “Lironi Marine Le Pen-in”.
Të hënën, një gjykatë në Paris caktoi një ndalesë 5-vjeçare ndaj Le Pen-in që të kandidojë për poste publike pasi ajo u dënua për shpërdorim të mbi 3 milionë euro fonde të BE-së për të paguar stafin e partisë në Francë.
Gjykatësi që mbikëqyri çështjen i quajti veprimet e saj “sulm serioz dhe afatgjatë ndaj rregullave demokratike në Evropë, veçanërisht në Francë”. Përveç ndalimit prej pesë vitesh, Le Pen u dënua me katër vjet burg (dy të pezulluar), arrest shtëpie dhe gjobë 100 mijë euro.
Trump tha se edhe pse nuk e njeh Le Pen-in, ai e admiron këmbënguljen e saj, duke thënë se ajo “vazhdoi përpara” pavarësisht pengesave. Ai e quajti akuzën ndaj saj një gabim i “llogari-mbajtjes”.
Pikëpamjet e Trumpit përshtaten me ato të donatorit kryesor të fushatës së tij, Elon Musk, i cili në fillim të kësaj jave shkroi në X: “Kur e majta radikale nuk mund të fitojë përmes votës demokratike, ata keqpërdorin sistemin ligjor për të burgosur kundërshtarët e tyre”.
Administrata e presidentit Trump edhe më parë ka kritikuar sulmet ndaj politikanëve të ekstremit të djathtë në Evropë, përfshirë përsëritjen e zgjedhjeve presidenciale në Rumani për shkak të ndërhyrjes së dyshuar ruse.
Musk ka tërhequr kritika të forta nga Evropa për lavdërimin e partive ekstremiste të krahut të djathtë si Alternativën për Gjermaninë (AfD) dhe ndër veprime të tjera pasi tha se lufta civile në Britani të Madhe është e “pashmangshme”.
