Gjyqtarja Etleva Deda është caktuar për të shqyrtuar dosjen ndaj ish-deputetit socialist Jurgis Çyrbja dhe dy bashkëpunëtorëve të tij, Ahmet Masha dhe Altin Hajri, pas shortit elektronik të hedhur këtë të mërkurë në mëngjes, 16 korrik.
Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim ish-deputetin, i cili u arrestua vitin e kaluar. Po ashtu, janë dërguar për gjykim në Gjykatën e Posaçme (GJKKO) edhe dy të pandehurit e tjerë.
Kujtojmë se ndaj Çyrbjes rëndojnë pesë vepra penale: dy akuza për “Tregim të sekretit shtetëror”, dy akuza për “Përkrahje e autorit të krimit” si dhe një akuzë për “Korrupsion aktiv në zgjedhje”.
Çyrbja dyshohet se ka premtuar mbështetje institucionale në këmbim të votave nga Hajri, i cili është ende i shpallur në kërkim ndërkombëtar. Hetimet vijojnë për bashkëpunëtorë të tjerë dhe funksionarë publikë të përfshirë.
Gjatë hetimit janë faktuar 8 episode gjatë periudhës 1 Maj 2020 deri më 8 Mars 2021, të zbulimit të informacioneve të përcaktuara me ligj si “sekret shtetëror”.
