Shaip Kamberi ka mundur të fitojë mandatin e deputetit, duke u bërë i vetmi përfaqësues shqiptar në Kuvendin e Serbisë.
Në zgjedhjet e përsëritura në Tërnoc, Kamberi arriti votat e nevojshme (698 nga 711 gjithsej) që të bëhet deputet në Parlamentin e Serbisë.
Ai ka reaguar pasi fitores, duke thënë se u arrit falë vullnetit të shqiptarëve të Luginës së Preshevës dhe punës së palodhshme të aktivistëve e simpatizantëve.
Kamberi zotohet se do të mbrojë interesat e shqiptarëve të cilët sipas tij, janë të shtypur dhe të diskriminuar.
“Përgjegjësitë janë të mëdha. Problemet janë të shumta. Konteksti është i vështirë.
Por me punë dhe unitet do t’ia dalim.
Zotohem se do të jem deputet i të gjithëve.
Zotohem se do t’i mbrojë interesat e qytetarëve që duan të drejta dhe mirëqenie. Interesat e shqiptarëve të shtypur dhe të diskriminuar.
Zotohem se do ta ndjek politikën e orientimeve pro-perëndimore, për paqe të qëndrueshme në rajon.
Vazhdojmë bashkë!
Për liri, për barazi, për demokraci”, shkruan ndër të tjera Shqipi në rrjetet sociale.
