Për herë të parë që nga shpërthimi i pandemisë tre vjet më parë, Kina do të lëshojë viza për turistët e huaj.  BBC shkruan, se lehtësimi i kufizimeve vjen pasi Pekini shpalli fitoren ndaj virusit, dhe u tërhoq nga një strategji zero-Covid, që ka dëmtuar ekonominë e tij.

Vizat e lëshuara përpara se Kina të mbyllej për botën në 28 Mars të vitit 2020 do të hyjnë në funksion duke filluar nga 15 Mars.

Hyrja pa viza për anijet turistike do të rifillojë në ishullin Hainan dhe Shangai. Grupet turistike nga Hong Kongu dhe Macau do të lejohen gjithashtu të hyjnë pa viza, ndërsa zyrat konsullore kineze jashtë vendit do të rifillojnë nga puna për aplikimin për viza.

"Heqja e kufizimeve shënon një hap të madh drejt rifillimit të jetës normale në Kinë. Dhjetëra miliona vizitorë ndërkombëtarë mbërrinin në Kinë çdo vit para pandemisë, por tashmë industria e saj e turizmit është goditur rëndë nga masat e rrepta anti-Covid. Megjithatë vendi mund të presë një rritje të konsiderueshme të turistëve, pasi të rihapë kufijtë", shkruan BBC duke cituar analistët.

Qytetarët kinezë gjithashtu do të lejohen të udhëtojnë me grupe turistike në 60 vende, nga 20 që ishin më parë.

"Kina tha se produkti i saj i brendshëm bruto u rrit vetëm 3% në 2022, më i keqi në gati gjysmë shekulli. Për vitin këtë vit, Pekini ka vendosur një objektiv prej 5% me Kryeministrin e ri Li Qiang duke thënë se ekonomia e dytë më e madhe në botë po stabilizohet dhe po rritet sërish", shkruan BBC.

Kujtojmë se, politika zero-Covid që u hoq në dhjetor ndezi protesta kundër liderit të Kinës, Xi Jinping. /Liberale.al