Nuk mund ta premtoj negociatat

Kancelarja gjermane Angela Merkel, në një takim virtual me parlamentarët e vendeve anëtarë dhe kandidate të BE-së, është shprehur skeptike për çeljen e negociatave me Shqipërinë qysh këtë vit, ndërsa shpreson që të hapë konferencën ndërqeveritare me Maqedoninë e Veriut qysh këtë vit

Kancelarja gjermane Angela Merkel shpreson që të hapë konferencën ndërqeveritare me Maqedoninë e Veriut qysh këtë vit. Ajo tha se shpreson që Bullgaria dhe Maqedonia e Veriut do ta mënjanojnë grindjen e tyre.

“Në rastin e Shqipërisë çështja është pak më ndryshe. Me gjithë përparimet, nuk mund të premtoj se do të ndodhë që këtë vit, por shumë shpejt”, tha kancelarja në një takim virtual me komisionet e parlamenteve të vendeve anëtarë të BE-së.

“Sa i përket Serbisë, ajo duhet të bëjë përparime në marrëdhëniet e saj me Kosovën”, tha kancelarja. Ajo ritheksoi edhe njëherë me këtë rast se ardhmja e vendeve të Ballkanit Perëndimor është në BE.

Krahas parlamentarëve të vendeve anëtarë në konferencë virtuale, një lloj bilanci i punës së Gjermanisë si kryetare e radhës së BE-së, e morën fjalën edhe parlamentare nga vendet kandidate. Në emër të Shqipërisë ishte deputetja Rudina Hajdari, e cila në pyetjen e saj se kur do të miratohet korniza negociuese, e falënderoi kancelaren dhe BE-në për programin e Komisionit të BE-së për Ballkanin Perëndimor dhe për ndihmën në kohën e  pandemisë.

Më 7 dhjetor ministrat e Jashtëm dhe të Evropës së BE-së do të vendosin për çeljen zyrtare të negociatave me Maqedoninë e Veriut dhe Shqipërinë. Vendimi përkatës është marrë në mars të këtij viti. Për shkak të grindjes mes Bullgarisë dhe Maqedonisë së Veriut për përkatësisë historike të maqedonasve, Bullgaria ka paralajmëruar se do të vërë veton për hapjen e konferencë së parë ndërqeveritare. Ajo që shpresohet për momentin është, sipas vëzhguesve, që së paku Bullgaria të mos pengojë miratimin e kornizës negociuese. Në rastin e Shqipërisë nuk pritet as miratimi i kornizës negociuese, pasi vendi nuk i ka plotësuar parakushtet e vëna nga BE-ja dhe Bundestagu Gjerman.

Shtyrja  për në mars 

Ambasadorët e vendeve anëtare të Bashkimit Evropian miratuan dje përfundimet për procesin e zgjerimit, pas publikimit të raporteve të radhës nga Komisioni Evropian.

Ndryshe nga projekt-përfundimet e mëparshme, propozimi i fundit i Presidencës gjermane nuk përmend me muajin dhjetor dhe shpresën për mbajtjen në këtë muaj të konferencës së parë ndërqeveritare me Shqipërinë apo Maqedoninë e Veriut. Por në dokumentin e siguruar nga Euroneës Abania thuhet se ajo do të mbahet sapo të jetë miratuar kuadri negociues, dhe për Shqipërinë, pasi të jenë plotësuar dy kushtet e mbetura, plotësimi i Gjykatës Kushtetuese dhe miratimi i Ligjit Anti-shpifje.

“Këshilli pret me padurim mbajtjen e konferencës së parë ndërqeveritare me Maqedoninë e Veriut dhe – nëse plotësohen kushtet e vëna në përfundime e Këshillit të Marsit 2020 – me Shqipërinë, sa më shpejt të jetë e mundur pas miratimit të kuadrit negociues nga Këshilli”.

Presidenca gjermane nuk ka qenë aspak aktive këto gjashtë muaj për të shtyrë më tej dosjen e zgjerimit, dhe tashmë duket se është dorëzuar duke mos u përpjekur që konferencat e para të anëtarësimit të mbahen brenda kësaj presidence, por siç duket kjo gjë do t’i kalojë presidencës pasardhëse portugeze.

Ndërsa për Shqipërinë mbeten ende dy kushte për t’u plotësuar, të cilat priten të plotësohen në dhjetor, për Maqedoninë e Veriut është Bullgaria ajo që vijon të bllokojë me kërkesën për të përfshirë në kuadrin negociues zbatimin e Traktatit të Miqësisë mes dy vendeve.

Ndërkohë një tjetër zhvillim interesant nga këto përfundime të Këshillit është se për herë të parë është hequr fare Turqia, e cila deri më sot figuronte në të njëjtin grup të vendeve të zgjerimit, si vend kandidat. Një mesazh i qartë ky i BE-së për këtë vend, pas përplasjeve dhe provokimeve të fundit në Mesdhe me Greqinë dhe Qipron, dhe para ndërmarrjes së sanksiononeve nga ana e BE-së kundrejt Turqisë, në Samitin e ardhshëm të dhjetorit.

Për Shqipërinë dhe Maqedoninë e Veriut, nëse kuadri negociues nuk miratohet në dhjetor, gjithçka shtyhet për këshillin e radhës të BE-së, i cili mbahet në mars nga presidenca portugeze.

Italia kërkon nga Gjermania përmirësim të tekstit për Shqipërinë 

Takimi i së hënës i Këshillit të Ambasadorëve të Bashkimit Evropian vendosi të bllokojë miratimin e përfundimeve për procesin e zgjerimit.

Korrespondenti i Euroneës Albania në Bruksel, Ernest Bunguri, bëri me dije se ka qenë Italia, ajo që i ka kërkuar presidencës gjermane, që të përmirësojë tekstin, sidomos për Shqipërinë.

“Ajo që pritet të ndodhë është se Gjermania duhet të vijë me një tekst të ri ditët në vijim, me sa kemi mësuar ky tekst nuk do të vonojë, pra do të përpiqen që ta prezantojnë këtë sa më shpejt,” – u shpreh Bunguri

Ndërkohë Holanda dhe Franca shfaqën sërish qëndrimin e tyre sipas së cilit Shqipëria nuk është ende gati dhe në njëfarë forme, edhe nëse Maqedonia e Veriut zhbllokon çështjen që ka me Bullgarinë, sërish Shqipëria të ndahet nga Maqedonia e Veriut në procesin integrues dhe nëse do të ketë konferencë ndërqeveritare të afërt, ajo të mbahet vetëm me Shkupin zyrtar.

Më herët Euroneës Albania raportoi se Konferenca e Parë Ndërqeveritare nuk do të zhvillohet brenda muajit dhjetor, por në mars.

Në dokumentin e siguruar nga Euroneës Abania thuhet se ajo do të mbahet sapo të jetë miratuar kuadri negociues dhe për Shqipërinë, pra pasi i të jenë plotësuar dy kushtet e mbetura, plotësimi i Gjykatës Kushtetuese dhe miratimi i Ligjit Anti-shpifje. /Gazeta Liberale

Tags: merkel, negociatat