Partia Socialiste nuk do të dërgojë propozim në raundin e parë për zgjedhjen e presidentit të vendit.
Ndërkohë, ditën e nesërme në Kryesinë e Kuvendit do të vijojnë negociatat mes grupeve parlamentare, për emrin e ri të kreut të shtetit.
Mësohet se fillimisht për presidentin e ri pritet të diskutohet mes kreut të grupit parlamentar socialist Taulant Balla dhe deputetes së PDIU, Mesila Doda, në ora 09:00.
Takimi i Ballës do të pasohet me deputetin e Partisë Republikane, Fatmir Mediu.
Ende nuk ka një konfirmim për një takim mes Taulant Ballës dhe kreut të grupit demokrat, Enkelejd Alibeaj, për çështjen e Presidentit.
Më herët Alibeaj i ka bërë të qarta kushtet.
PS duket se po ndjek strategjinë që ndoqi PD kur zgjodhi me votat e saj Bujar Nishanin, duke mos kandiduar asnjë emër, në tre raundet e para.
Nëse palët nuk gjejnë një emër konsensual, që të votohet me shumicë të cilësuar në tre raundet e para, Kuvendi nuk mund të zgjedhë dot presidentin.
PS ka përjashtuar mundësinë për bashkëpunim me grupin parlamentar që mbështet Berishën dhe nuk ka asnjë kontakt me LSI, për presidentin e ri.
Kësisoj, ja dy alternativa: Presidenti i ri do të zgjidhet në raundin e katërt nga radhët e PS ose të shoqërisë civile me votat e socialistëve, ose do të dalë më shpejt nga ndonjë marrëveshje mes PS-së dhe PD-së (grupi i Alibeajt) dhe do të votohet nga mbi 100 deputetë. /Liberale.al/
