Kryesore

Negociatat në dorë të Kushtetueses

               Publikuar në : 09:26 - 20/10/20 liberale

Ngritja e Kushtetueses për datën e konferencës së parë ndërqeveritare. Ky është këmbimi që i quhet Shqipërisë të bëjë për të vijuar me bisedimet për anëtarësim në BE, ndërsa Kim dhe Soreca bëjnë thirrje për plotësimin e saj deri në fund të vitit

Kanë kaluar shtatë muaj nga dita kur BE dha dritën jeshile për çeljen e negociatave  me Shqipërinë dhe katër muaj nga votimi i Parlamentit Europian për Rezolutën e Ballkanit, ku  u theksuan edhe njëherë  15 kushtet që qeveria Rama do të duhet të përmbushte ndërkohë, ndërsa ende një prej emergjentëve që lidhen me datën e konferencës së parë ndërqeveritare nuk është përmbushur.

Nga Munihu kryeministri Rama nuk i është larguar shumë retorikës së zhgënjimit të një viti më parë, kur dy vendeve të Ballkanit iu tha “jo” nga familja europiane, me veton e Francës.

“Ne jemi të verbuar nga dashuria për Europën,  por ajo thotë se do të martohet me ne Por si mund të martohemi kur Europa nuk na flet”, ka thënë ai ndërsa pa kaluar 24 orë përfaqësuesi i  Bashkimi Europian në Shqipëri i është përgjigjur kryeministrit shqiptar duke i kujtuar ngritjen e Gjykatës Kushtetuese.

“Ne kemi vite që flasim me Shqipërinë dhe BE flet me Shqipërinë. Europa është këtu. Unë flas me Shqipërinë. Vendimi i marrë në mars për negociatat u mor në një moment të vështirë”, do të shprehej  ambasadori Luigi Soreca nga Kukësi. E ndërsa përgëzonte përmbushjen e shumë kushteve dhe shprehte besimin e plotësimit të të gjithave, që do të çonte në një vendim përfundimtar, Soreca theksoi fokusin tek Reforma në Drejtësi e më konkretisht tek Gjykata Kushtetuese.

Fokusi i Shqipërisë duhet të jetë tek gjykata kushtetuese pasi është një hap i rëndësishëm për ecjen e vendit përpara. Ajo që është e rëndësishme është që Shqipëria të bëjë segmentin e fundit me qëllim që Këshilli Europian të bëjë hapin pozitiv”, do të thoshte, ndërsa përshëndeste hapin e presidentit për çeljen e  dy vendeve vakante për Gjykatën Kushtetuese.

Vetëm pak ditë më parë, presidenti Meta i dërgoi Këshillit të Emërimeve në Drejtësi listën me 10 kandidatë,  me qëllim plotësimin e vakancës së krijuar në Gjykatën Kushtetuese, për plotësimin e vendit vakant të ish-gjyqtarit Besnik Imeraj.

Në letrën dërguar KED-së, me listën e kandidatëve, kreu i shtetit e rikujtonte Këshillin

për plotësimin e vendit vakant të ish-gjyqtarit Besnik Muçi, që aktualisht KED ka në proces,

“të punojë pa ndërprerje, që të përfundojë sa më parë e sipas ligjit, shqyrtimin e kandidaturave; të angazhohet me të gjitha kapacitetet për vlerësimin dhe pikëzimin e kandidatëve të cilëve u lejohet kandidimi; dhe t’i propozojë Presidentit listën e kandidatëve për plotësimin e kësaj vakance, sipas Kushtetutës dhe ligjit”, ishte apeli i Metës, ndërsa Muçi u zgjodh nëntorin  e shkuar nga Presidenti, ende pa kaluar vetingun. Prania e tij në Gjykatën e cungët Kushtetuese, ku sot janë anëtarë Vitore Tusha, Fiona Papajorgji, Elsa Toska dhe Marsida Xhaferllari, ishte e shkurtër pasi Kolegji i Posaçëm i Apelimit mori vendimin për ta shkarkuar nga detyra Muçin.

Meta përsëriti  edhe një herë thirrjen ndaj Këshillit të Lartë Gjyqësor që të punojë në mënyrë të pandërprerë në drejtim të verifikimit dhe vlerësimit të kandidaturave për plotësimin e të gjitha vendeve vakante në Gjykatën e Lartë, që jo vetëm duhet të jetë plotësisht funksionale sa më shpejt për shqyrtimin e çështjeve të mbartura, por kjo Gjykatë duhet të jetë funksionale për të emëruar dhe 3 anëtarët e tjerë të Gjykatës Kushtetuese.

“KLGJ duhet të bëjë vlerësimin dhe ky është një kusht që duhet të përmbushet në javët në vijim për fatin e Konferencës së parë ndërqeveritare”, do të theksonte edhe ambasadori Soreca, duke u ndalur edhe tek Marrëveshja e 5 qershorit, e firmosur nga palët politike shqiptare në ambasadën e ShBA-së në Tiranë dhe me ndërmjetësim të fortë të diplomatëve të huaj në vendin tonë.

“Ne kemi shprehur keqardhjen që maxhoranca vijon punën pa konsesus dhe është e rëndësishme që të gjendet konsensusi mes palëve. Duhet të punojnë fort që zgjedhjet të jenë të lira dhe të ndershme”, është shprehur Soreca, ndërsa Parlamenti miratoi Kodin Zgjedhor dhe ndryshimet kushtetuese për koalicionet, ku partitë që duan të hyjnë bashkë në zgjedhjet e 25 prillit të vitit tjetër do të duhet ta bëjnë në një listë apo sigël të vetme.

Edhe Komisioneri për Zgjerim Oliver  Varhelyi  do të shprehej i prerë se  Gjykata Kushtetuese duhet funksionale para Konferencës së parë ndërqeveritare.

Por përtej Europës, të cilën presim të na hapë dyert kundrejt përmbushjes së kushteve, edhe Shtetet e Bashkuara të Amerikës, si investues të Reformës në Drejtësi,  theksojnë ngritjen e Gjykatës Kushtetuese.

“Presidenca dhe Parlamenti kanë publikuar listat e tyre përkatëse të kandidatëve për Gjykatën Kushtetues. Ne i duartrokasim ata që iu përgjigjën thirrjes për të shërbyer. Ne inkurajojmë Këshillin e Emërimeve në Drejtësi të veprojë shpejt për të vlerësuar kandidatët. Flamuri i Shqipërisë duhet të ketë Gjykatë Kushtetuese deri në fund të vitit”, ka reaguar ambasadorja e ShBA-së, Yuri Kim, ndërsa një nga përparësitë e saj diplomatike, qysh nga kandidatura e saj për ambasadore në Shqipëri ka qenë puna për zbatimin e plotë të reformave në Gjyqësor.

Pak muaj më parë Kim lëshonte mesazhin e fortë  se shpresonte të mos kishte një marrëveshje të fshehtë për të vrarë Reformën në Drejtësi.

Ndërsa i drejtohet Kolegjit të Posaçëm të Apelimit, ambasadorja Kim i përcillte politikës shqiptare se ishte koha për t’i dhënë fund lojërave.

“Shtetet e Bashkuara duan të njëjtën gjë që do dhe populli shqiptar. Duam që Shqipëria të jetë një aleat i fortë i SHBA. Duam të jeni pjesë e familjes europiane. Nuk mund ta arrini këtë pa Reformën Zgjedhore dhe Reformën në Drejtësi. Këto nuk janë gjëra me të cilat mund të bëhet pazar, por domosdoshmëri. Ka ardhur koha të mos bëni më lojëra”, thoshte ambasadorja amerikane pak muaj më parë.

Dje ajo ka vendosur afatin e fundit të vitit, ndërsa një vit më parë ishte Soreca që shprehej me besim se Gjykata Kushtetuese dhe  SPAK do të ishin gati dhjetorin e 2019-s.

Por e para u përfshi në ngërçin mes Presidentit dhe KED-së, që çoi në zgjedhjen e dy anëtarëve për të njëjtin vend, padinë nga ish-kreut të KED-së Dvorani, i liruar nga detyra në krye të  Gjykatës së Lartë nga KLGj, pasi ishte presidenti Meta që vuri në dukje se mandati i tij kishte më shumë se gjashtë vite që kishte përfunduar.

Ndonëse kryeministri Rama shprehej nga Mynihu se BE nuk duhej të ndikohej nga çështjet e brendshme të politikës shqiptare në vendimin e saj,  duket se unioni do të refuzojë të ulet në tryezë me Shqipërinë për të çuar përpara bisedimet për kapitujt e anëtarësimit pa u çuar në fund dy nga tri pikat e para, që lidhen me funksionimin e plotë të Gjykatës Kushtetuese  me të nëntë anëtarët dhe Gjykatës së Lartë ende jo e plotë, e cila duhet të zgjedhë tre anëtarë të Kushtetueses. /Gazeta Liberale

Tags: , ,

KOMENTO (0)

Shkruaj nje koment

Your email address will not be published. Required fields are marked *

* *

Back