Takimi mes kryeministrit të Kosovës, Albin Kurti dhe presidentit të Serbisë, Aleksandër Vuçiç pas njw ndërprerje ka rinisur dhe vijon ende në Ohër të Maqedonisë së Veriut, në kuadër të dialogut për arritjen e një marrëveshjeje për normalizimin e marrëdhënieve.
Debati është përqendruar momentalisht te Asociacioni i komunave me shumicë serbe.
Vuçiç kërkon formimin e Asociacionit në bazë të marrëveshjes së viti 2013, ndërsa Kurti e ka kundërshtuar diçka të tillë.
President serb Vuçiç ka kërkuar që Asociacioni të formohet në bazë të marrëveshjes së viti 2013, duke mos marrë parasysh ndryshimet që janë bërë nga Gjykata Kushtetuese e Kosovës në vitin 2015. Kryeministri Kurti e ka kundërshtuar këtë dhe ka kundërshtuar gjithashtu, edhe afatin që është vënë në planin e zbatimit.
Në planin e zbatimit, duhet që brenda 15 ditësh nga nënshkrimi i marrëveshjes, qeveria e Kosovës të paraqesë draftin e parë të statutit të Asociacionit, i cili vazhdon më pas dhe negociohet për çështjen e kompetencave.
Sakaq, ish-ministri i Jashtëm, Paskal Milo nuk beson se do të ketë një marrëveshje, nga takimi i sotëm në Ohër mes kryeministrit të Kosovës, Albin Kurti dhe presidentit të Serbisë, Aleksandër Vuçiç.
Milo u shpreh se do të ketë sërish negociata, të cilat mund të mbahen pas disa ditësh.
Sipas Milos, fakti që takimi vijon prej orësh, do të thotë se palët nuk kanë dakordësi.
“Sot, për mua, nuk besoj se do të dalë “tym i bardhë” nga oxhaku i vilës së Titos në Ohër. Nuk besoj se sot do të kemi një marrëveshje përfundimtare për pranimin e aneksit në mënyrë të detajuar nga të dyja palët. Besoj se do të lihet dera e hapur, për të pasur një bisedë të dytë, një negocim të dytë që mund të jetë pas disa ditësh. Aneksi u është paraqitur palëve, për mënyrën sesi do të zbatohet marrëveshja. Por palët kanë paraqitur opsionet e tyre rreth aneksit që u është propozuar. Çfarë është propozuar nga Beogradi, nuk është e thënë që të pranohet nga Prishtina. Çfarë është propozuar nga Prishtina, nuk është e thënë të pranohet nga Beogradi.”, theksoi ai në një intervistë për Euronews Albania. Vila ku po mbahet takimi Kurti-Vuçiç në Ohër, dikur ishte në pronësi të ish liderit jugosllav, Josip Broz Tito.
Ndërmjetësues të takimit janë diplomatët evropianë, Josep Borrell dhe Mirosllav Lajçak. Në cilësinë e vëzhguesit është i dërguari i SHBA-së për Ballkanin Perëndimor, Gabriel Escobar.
Në tryezë të diskutimeve gjendet aneksi i zbatimit të një propozimi të BE-së për normalizimin e marrëdhënieve Kosovë-Serbi. Kurti dhe Vuçiç e kanë pranuar në parim propozimin e BE-së gjatë një takimi në Bruksel, më 27 shkurt. Propozimi i BE-së nuk e obligon Serbinë që ta njohë Kosovën, por kërkon nga të dyja vendet që t’i njohin dokumentet e njëra-tjetrës, si: pasaportat, diplomat dhe targat e makinave.
SHBA-ja e ka mbështetur propozimin e BE-së, i cili më herët është njohur edhe si plani franko-gjerman dhe pret gjithashtu arritjen e marrëveshjes.
