Sipas një deklarate të fundit nga Shtabi i Përgjithshëm i forcave të armatosura të Ukrainës, numri i ushtarëve rusë të vrarë ose të plagosur në Ukrainë ka kaluar shifrën e 1 milionëve. Ky zhvillim shënon një pikë kthese të rëndësishme në luftën që nisi më 24 shkurt 2022 dhe që vazhdon prej më shumë se tre vitesh.
Njoftimi ukrainas u bë publik në të njëjtën ditë që Rusia festonte Ditën e Sovranitetit, ndërsa Presidenti Vladimir Putin mbajti një takim në Kremlin me disa ushtarë të dekoruar që kanë shërbyer në frontin e luftës. Megjithatë, as ai dhe as ndonjë zyrtar tjetër rus nuk e komentuan këtë pretendim.
Vlerësimet ukrainase përputhen edhe me ato të inteligjencës perëndimore. Ministria e Mbrojtjes e Mbretërisë së Bashkuar konfirmoi të enjten, përmes një deklarate në rrjetin social X, se Rusia ka humbur mbi 1 milion trupa, përfshirë rreth 250,000 të vrarë që nga fillimi i pushtimit.
Po ashtu, më herët gjatë muajit, Qendra për Studime Strategjike dhe Ndërkombëtare (CSIS) në Uashington tha se Rusia ka shumë gjasa të arrijë shifrën e 1 milion viktimave këtë verë. Institucioni e përshkroi këtë si një “moment historik tronditës dhe alarmues”.
