Presidentja e Kosovës, Vjosa Osmani, është kërcënuar me jetë përmes një e-maili të dërguar ditë më parë. Mesazhi përmbante gjuhë të rëndë dhe kërcënime serioze ndaj saj.
Pas këtij rasti, Prokuroria Speciale e Kosovës ka njoftuar se ka nisur hetimet për të zbuluar se kush qëndron pas kërcënimit. Ata kanë autorizuar Policinë që të ndërmarrë të gjitha veprimet e nevojshme për të identifikuar personin që e ka dërguar mesazhin.
Nga Presidenca e Kosovës kanë deklaruar se kërcënime të tilla ndaj Presidentes nuk janë të reja. Sipas tyre, këto kërcënime kanë ndodhur disa herë gjatë viteve, por asnjëherë askush nuk është ndëshkuar për to.
Bekim Kupina, këshilltari për media i Presidentes Osmani, tha se ky rast është i veçantë në historinë e institucioneve të Kosovës, pasi askush nga ata që kanë kërcënuar Presidenten dhe familjen e saj, nuk është përballur me drejtësinë deri më sot.
