Më shumë se 45 persona kanë humbur jetën dhe dhjetëra të tjerë janë plagosur në Rripin e Gazës pas sulmeve të fundit nga ushtria izraelite, sipas autoriteteve palestineze të drejtuara nga Hamasi.
Agjencia palestineze e lajmeve WAFA raportoi se sulmet ndodhën në disa zona të ndryshme, përfshirë Jabalia, Deir al-Balah dhe pranë Khan Younis në jug të Gazës. Deri tani, këto informacione nuk janë konfirmuar në mënyrë të pavarur.
Ushtria izraelite (IDF) nuk ka dhënë detaje të plota për këto sulme, por në një postim në rrjetin social X, tha se gjatë ditës së djeshme kishte goditur mbi 115 objektiva në Gaza nga toka, deti dhe ajri.
Gjatë ditëve të fundit, dhuna është rritur ndjeshëm në Gaza, pasi Izraeli ka nisur një ofensivë të re të fuqishme. Për pasojë, çdo ditë po raportohen dhjetëra të vrarë në këtë zonë bregdetare.
Situata mbetet shumë e rëndë dhe numri i viktimave po rritet dita-ditës.
