Agjencia e Ushqimit dhe Veterinarisë në Kosovë (AUV) ka vendosur të ndalojë përkohësisht importin e mishit të pulës dhe produkteve të tjera të shpendëve nga Brazili, duke filluar nga data 20 maj 2025. Ky vendim vjen si reagim ndaj një shpërthimi të konfirmuar të gripit të shpendëve (H5N1) në një fermë në Rio Grande të Brazilit, më 16 maj 2025.
Sipas AUV-së, masa është ndërmarrë për të mbrojtur shëndetin publik dhe për të parandaluar përhapjen e mundshme të virusit në territorin e Kosovës. Edhe pse nuk ka dëshmi që konsumimi i mishit ose vezëve të infektuara paraqet rrezik për njerëzit, ndalimi konsiderohet një masë paraprake për të garantuar sigurinë ushqimore.
Vendimi i Kosovës është në harmoni me veprimet e ndërmarra nga disa shtete të tjera, përfshirë Bashkimin Evropian dhe Kinën, që gjithashtu kanë pezulluar importin e mishit të pulës nga Brazili pas shpërthimit të virusit. Ndalimi do të mbetet në fuqi deri në një njoftim të ri, në varësi të ecurisë së situatës epidemiologjike dhe vlerësimeve të mëtejshme të rrezikut nga ana e AUV-së.
