Kina emëroi në mënyrë të përshpejtuar një negociator të ri tregtar të hënën, një pozicion kyç në çdo bisedim për të zgjidhur luftën e përshkallëzuar tarifore me Shtetet e Bashkuara, duke zëvendësuar carin veteran të tregtisë, Wang Shouwen me të dërguarin kinez në Organizatën Botërore të Tregtisë.
Li Chenggang, 58 vjeç, një ish-ndihmës sekretar i tregtisë gjatë administratës së parë të presidentit amerikan Donald Trump, zëvendëson Wang, 59 vjeç, tha në një deklaratë Ministria e Burimeve Njerëzore dhe Sigurimeve Shoqërore.
Nuk është e qartë nëse Wang, i cili kishte marrë pozicionin e dytë më të lartë në hierarkinë e Ministrisë së Tregtisë në vitin 2022, mori ndonjë pozicion tjetër. Emri i tij nuk është më në ekipin drejtues të ministrisë, siç tregohet aktualisht në faqen e saj.
Ministria nuk iu përgjigj menjëherë një kërkese për koment mbi ndryshimin, për të cilin nuk jepet asnjë shpjegim në deklaratën e Ministrisë së Burimeve Njerëzore.
Ndryshimi në udhëheqjen në Departamentin e Tregtisë vjen në një kohë kur Pekini ka marrë një qëndrim të ashpër në luftën tregtare në përshkallëzim me Uashingtonin, e cila u ndez nga tarifat e larta të Trump për mallrat e importuara nga Kina.
Ndryshimi i papritur vjen gjithashtu pasi presidenti Xi Jinping është në një turne në Azinë Juglindore për të forcuar lidhjet ekonomike dhe tregtare me vendet fqinje në mes të një bllokimi me Shtetet e Bashkuara.
Ministri i Tregtisë Wang Wendao ishte ndër zyrtarët e rangut të lartë që shoqëruan Xi në vizitën e tij në Vietnam, Malajzi dhe Kamboxhia këtë javë.
“Ne vetëm mund të spekulojmë se përse ndodhi ky ndryshim në këtë kohë të caktuar; por mund të ndodhë që, sipas pikëpamjes së lidershipit të lartë kinez, duke pasur parasysh se tensionet vazhdojnë të përshkallëzohen, nevojitet dikush tjetër për të thyer ngërçin në të cilin ndodhen të dy vendet (red.: Kina dhe Shtetet e Bashkuara) dhe më në fund të fillojnë të negociojnë,” thotë Alfredo Montufar-Elu .
Ndryshe nga shumë vende të tjera, të cilat iu përgjigjën planeve të Trump për tarifa ndëshkuese duke kërkuar marrëveshje dypalëshe me Uashingtonin, Pekini është përgjigjur duke vendosur tarifat e veta për mallrat amerikane dhe nuk ka kërkuar bisedime, të cilat sipas tij mund të zhvillohen vetëm në bazë të respektit dhe barazisë reciproke.
Uashingtoni njoftoi dje, të martën, se Trump është i hapur për të përfunduar një marrëveshje tregtare me Kinën, por këmbënguli që Pekini duhet të bëjë lëvizjen e parë dhe se Kina ka nevojë për "paratë tona".
