Italia vijon të përballet me mot ekstrem, teksa Mbrojtja Civile ka lëshuar alarmin portokalli për ditën e sotme në rajonin e Lombardisë dhe në pjesën më të madhe të Veneto-s dhe Friuli Venezia Giulia-s. Ndërkohë, alarmi i verdhë është shpallur edhe për Trentino-Alto Adige, Toskanë, Lazio, Umbria, Marche, Campania, si dhe disa zona të Piemonte-s, Ligurisë dhe Emilia-Romagna-s.
Pas valës së fortë të të nxehtit që ka përfshirë gadishullin nga veriu në jug, fundjava solli një përmbysje të kushteve atmosferike me reshje, erëra të forta dhe stuhi në shumë zona. Mediat lokale raportojnë për dëmtime dhe plagosje të lehta në disa rajone të veriut, për shkak të rënies së pemëve dhe objekteve të tjera.
Sipas Meteo.it, këto ditë shënojnë fillimin e paqëndrueshmërisë së parë të muajit korrik. Moti pritet të përkeqësohet edhe më tej, veçanërisht në verilindje dhe në pjesët e brendshme të Italisë Qendrore dhe Jugore.
Ekspertët paralajmërojnë se një sistem i ri me stuhi të fuqishme, i quajtur “shqetësimi numër 2 i korrikut”, do të godasë vendin gjatë pjesës së dytë të ditës së sotme. Ky sistem do të sjellë me vete një rënie të ndjeshme të temperaturave dhe reshje të shumta, sidomos në verilindje dhe në zonat e Apenineve.
Sipas parashikimeve, vala e të nxehtit që ka mbajtur Italinë për ditë të tëra pritet të tërhiqet plotësisht deri në mesin e javës, përfshirë edhe rajonet më jugore dhe Siçilinë.
