Presidenti i Emirateve të Bashkuara Arabe Sheikh Khalifa bin Zayed Al Nahyan ka vdekur sot, sipas asaj që njofton agjencia shtetërore e lajmeve të Emirateve, WAM. Ai ishte 73 vjeç.
Lajmi ka qenë befasues, pasi nuk ishte folur këto ditë për shëndetin e tij.
“Ministria e Çështjeve Presidenciale njoftoi se do të shpallen zyrtarisht 40 ditë zie me flamujt në gjysmështizë dhe tre ditë mbyllje të ministrive dhe subjekteve zyrtare në nivel federal dhe lokal si dhe në sektorin privat”, shkroi agjencia në Twitter.
Sheikh Khalifa ishte parë rrallë në publik që kur pësoi një goditje në tru në vitin 2014, krah vëllait të tij, Princit të Kurorës së Abu Dhabit, Mohammed bin Zayed (i njohur si MBZ) që shihej si sundimtari de fakto dhe vendimmarrësi kryesor i politikës së jashtme. Ishte ai që vendosi për t’iu bashkuar një lufte të udhëhequr nga Arabia Saudite në Jemen apo dhe kur vendosi për të udhëhequr një embargo ndaj Katarit fqinj, gjatë viteve të fundit.
“Emiratet e Bashkuara Arabe kanë humbur birin e tyre të mirë dhe udhëheqësin e “periudhës së fuqizimit”, kujdestarin e udhëtimit të saj të bekuar,” tha MBZ në Twitter, duke lavdëruar mençurinë dhe bujarinë e Khalifa.
Sipas kushtetutës, Zëvendës Presidenti dhe Kryeministri Sheikh Mohammed bin Rashid Al Maktoum, sundimtari i Dubait, do të mbajnë detyrën e presidentit derisa këshilli federal me sundimtarët e shtatë emirateve të mblidhet brenda 30 ditëve për të zgjedhur një president të ri.
Ngushëllimet e para vërshuan nga liderët arabë, duke përfshirë mbretin e Bahreinit, presidentin e Egjiptit dhe kryeministrin e Irakut.
Sheikh Khalifa erdhi në pushtet në vitin 2004 në emiratin më të pasur Abu Dhabi dhe u bë kreu i shtetit. Ai pritet të pasohet si sundimtar i Abu Dhabit nga Princi i Kurorës Sheikh Mohammed.
Abu Dhabi, i cili mban pjesën më të madhe të pasurisë së naftës të shtetit të Gjirit, ka mbajtur presidencën që nga themelimi i federatës së Emirateve të Bashkuara Arabe nga babai i Sheikh Khalifa, i ndjeri Sheikh Zayed bin Sultan Al Nahyan, në vitin 1971. /Liberale.al/
