Përshtati për Liberale.al, Laert MIRAKU
Twin, ekzoskeleti i prodhuar nga bashkëpunimi i Institutit Italian të Teknologjisë dhe Inail, i destinuar për personat me dëmtime të shtyllës kurrizore, u prezantua në Milano.
Ditët e fundit në Muzeun Kombëtar të Shkencës dhe Teknologjisë në Milano u prezantua një ekzoskelet robotik tërësisht italian, i cili lejon ecjen e njerëzve me paralizë për shkak të lezioneve të pjesshme ose të plota të palcës kurrizore. Rezultati i bashkëpunimit ndërmjet Institutit Italian të Teknologjisë dhe Inail prodhoi Twin (ky është emri i pajisjes) e cila mund të dalë në treg në 5 ose 6 vjet, pasi të jenë marrë autorizimet e nevojshme dhe të ketë nisur procesi i industrializimit.
DALLIMET ME PARAARDHËSIT. Krahasuar me modelet eksperimentale që i paraprinë, Twin ( shiko videon e prezantimit, më poshtë ) është më i lehtë për t'u përdorur dhe veshur, mund të çmontohet dhe rimontohet shpejt, madje është elegant, sepse është krijuar me kontributin e stilistëve. Një detaj pa rëndësi dytësore, i cili përfaqëson mirë idenë e të gjithë projektit: atë të krijimit të një instrumenti që plotëson nevojat e atyre që do të duhet ta veshin dhe që pacientët inkurajohen ta përdorin.
"Në dizajnimin ne filluam nga pacientët, të përfshirë me pyetësorë dhe grupe fokusi nga të cilat doli nevoja për të pasur një ekzoskelet që mund të përdoret në mënyrë të pavarur, të rehatshme dhe të transportueshme", shpjegoi Matteo Laffranchi, koordinator i Inail-IIT Rehab Technologies Lab. Në veçanti, disa pacientë ishin thelbësorë gjatë të gjitha fazave të zhvillimit, duke u mundësuar që ta përjetonin pajisjen nga dora e parë teksa ajo ishte e përsosur.
RIMBUSHET NË 1 ORË. Ergonomik dhe i adaptueshëm me karakteristikat e individëve, Twin është i pajisur me motorë që mbështesin synimet e përdoruesit dhe mund të vendoset nëpërmjet një tableti në mënyrë që të rregullojë ritmin sipas nevojave. Energjia sigurohet nga një bateri që ka një autonomi prej 4 orësh dhe rikarikohet në një orë.
"Twin mund të punojë në 3 mënyra, vazhdon Laffranchi; për ecjen e pacientëve me paralizë të plotë, për ata që kanë lëvizshmëri të mbetur, por kanë nevojë për mbështetje dhe për ata që kanë një dëmtim të pjesshëm dhe të ndryshëm në dy gjymtyrët".
Përfitimet e ekzoskeletit shkojnë shumë përtej ecjes, e cila aktualisht ndodh në kontekste të mbrojtura. Franco Molteni, drejtor i njësisë operacionale të kompleksit funksional të rimëkëmbjes dhe rehabilitimit të Villa Beretta (LC), ku u zhvillua një pjesë e eksperimentit, shpjegon: “Fakti i të qenurit në këmbë dhe i aftësisë për të ecur përmirëson aspektin emocional dhe vizionin e vetes në botë dhe ka efekte të shumta fiziologjike, për shembull në funksionin e zorrëve dhe përgjigjen imune."
Për të marrë përfitimet më të mëdha, "ky lloj rehabilitimi duhet të futet sa më shpejt që të jetë e mundur pas një dëmtimi", përfundoi Ilaria Baroncini, fiziatre e Njësisë Spinale në Institutin e Rehabilitimit Montecatone.
