Aktualitet

Trajneri Edi Reja shpall listën e lojtarëve të grumbulluar për ndeshjet me Hungarinë dhe Poloninë

Shkruar nga Liberale
Trajneri Edi Reja shpall listën e lojtarëve të grumbulluar

Trajneri i Kombëtares shqiptare, Edoardo Reja ka bërë publike listën me emrat e 25 lojtarëve që do të grumbullohen për dy ndeshjet e eliminatoreve të Botërorit “Katar 2022” ndaj Hungarisë dhe Polonisë.

Lista e Kombëtares tonë ka pak ndryshime në krahasim me grumbullimin e fundit, teksa surpriza është rikthimi i Ivan Balliut, i cili po kalon një periudhë të mirë me Rayo Vallecanon-n në Spanjë.

Rikthehen në dispozicion Ermir Lenjani, Kastriot Dermaku dhe Federic Veseli, të cilët munguan në ndeshjet e fundit për shkak të problemeve fizike. Do të mungojë për shkak dëmtimi mesfushorët Qazim Laçi dhe Armir Abrashi, i cili është dëmtuar pak ditë më parë dhe nuk do të ketë mundësi të luajë për kuqezinjtë.

Pjesa tjetër e listës nuk ka ndryshime, teksa pas angazhimeve me klubet në fundjavë lojtarët do të grumbullohen të hënën në kompleksin “Tropikal” në Durrës për të nisur përgatitjet për dy ndeshjet e radhës të cilat janë vendimtare për Kombëtaren në eliminatoret e Botërorit.

Shqipëria renditet aktualisht e dyta në Grupin I me 12 pikë pas 6 ndeshjesh dhe në 9 tetor do të sfidojë Hungarinë në transfertë. Më 12 tetor në stadiumin “Air Albania” kuqezinjtë do të presin Poloninë, aktualisht rivalin direkt për vendin e dytë.

Të hënën trajneri i Kombëtares, Edoardo Reja do të dalë në konferencë për shtyp e cila do të zhvillohet në orën 13:15 në kompleksin “Tropikal” në Durrës, ku do të shpjegojë edhe zgjedhjet dhe do të analizojë dy sfidat e radhës.

Liberale Newsroom

Poll
SHQIPENGLISH