Një turist britanik ka humbur jetën pasi u godit nga rrufeja teksa e dashura e tij raportohet se po e filmonte teksa ishte duke notuar në det, në Greqi.
26-vjeçari ka humbur jetën tragjikisht pasditen e sotme teksa ndodhej në plazh në zonën e Agia Agathi të Rodosit. Shërbimet e urgjencës e nxorën britanikun në breg dhe u përpoqën me dëshpërim t’i shpëtonin jetën, por ai nuk mbijetoi.
Një ish-futbollist vendas, 47-vjeç, i cili u përpoq të shpëtonte britanikun, tha për gazetën greke Rodiaki: “Sapo iu afrova, pashë se ai ishte me fytyrën poshtë në ujë dhe fytyra ishte e mavijosur. Menjëherë e kuptova se çdo sekondë ishte vendimtare dhe fillova ta tërhiqja në breg”.
Rodiaki raportoi se ai kishte qenë duke vozitur, media të tjera greke thonë se ai kishte qenë duke notuar në momentin e incidentit. Dëshmitari që luan për ekipin e futbollit Agios Georgios Malonas shtoi: “Isha i shqetësuar se do të më ndodhte e njëjta gjë pasi binte ende shi, por nuk u ndala. Shpëtimtarët mbërritën menjëherë më pas dhe kryen të gjitha procedurat e ringjalljes për ta mbajtur atë në jetë. Për fat të keq, e mora vesh pak më vonë se ai nuk ia doli.’
Në momentin e aksidentit tragjik, zona jashtë ishullit grek raportohet se po përjetonte mot të keq dhe stuhi të forta. /Liberale.al/
