Qeveria ka hartuar një plan për të nxitur të moshuarit të ndjekin arsimin e lartë.
Janë publikuar këtë të enjte notat e provimit të maturës për gjuhën e huaj, ku ndër maturantët që e dhanë provimin ishte edhe 74-vjeçari Skënder Cena.
Mësohet se ai ka marrë notën 7 dhe ka arritur të sigurojë diplomën e maturës, pasi ka kaluar me sukses provimin e gjuhës së huaj, në përpjekjen e tij të dytë.
74-vjeçari Cena ishte shprehur ditën e provimit se priste një notë kaluese, si 6, por duket se ia ka tejkaluar edhe vetes pritshmëritë.
Por cila është historia e tij që e pengoi të arsimohej në kohë?
Një aksident në rininë e tij, në hidrocentralin e Fierzës, i mori pjesërisht shikimin dhe u bë pengesë për të vijuar shkollimin.
Megjithatë, në moshën 64-vjeçare, ai iu rikthye mësimit, duke ndjekur një shkollë profesionale në Kamëz. Mosha nuk e favorizoi në provimet e mëparshme të maturës dhe në atë kohë nuk arriti të kalonte provimin e anglishtes. Por në përpjekjen e tanishme, ai ka arritur të realizojë ëndrrën e tij.
Në botë janë edhe më të zakonshme histori të tilla ku edhe më të moshuar se Cena ndjekin arsimin e mesëm ose të lartë.
