Komisioni i Ankesave dhe Sanksioneve (KAS) ka vazhduar punën për të shqyrtuar ankesat e Partisë Demokratike (PD) për zgjedhjet e 11 majit. PD kundërshton rezultatet në të 12 qarqet e vendit, duke kërkuar pavlefshmërinë dhe përsëritjen e zgjedhjeve.

Kukës – Vendimi jepet më 5 qershor

Një nga rastet e shqyrtuara ishte ai i qarkut Kukës. PD kërkon që zgjedhjet në këtë qark të shpallen të pavlefshme dhe të përsëriten. KAS përfundoi shqyrtimin e kësaj ankese dhe do të shpallë vendimin të enjten, më 5 qershor, në orën 09:50.

Fieri – Shtyhet mbledhja, kërkohet më shumë kohë për prova

Për qarkun e Fierit, përfaqësuesi i PD-së, Franc Nuri, pretendoi se zgjedhjet nuk kanë qenë të rregullta. Ai akuzoi për përdorim të administratës shtetërore në fushatë, presione ndaj votuesve dhe manipulim të votës së diasporës. PD kërkoi hapjen e kutive të votimit dhe kontrollin e fletëve të papërdorura, duke thënë se mungojnë mbi 130 mijë të tilla. Deri më tani, në qarqe si Vlora dhe Berati, këto fletë janë gjetur në kuti. KAS vendosi të shtyjë shqyrtimin për Fierin për javën tjetër, për të lejuar mbledhjen e më shumë provave.

Durrësi – Akuzat për manipulim brenda partisë

Në Durrës, u trajtua rasti i dy kandidatëve të PD-së, Aulon Kalaja dhe Ilirjana Kuçana. Ata pretendojnë se votat e tyre janë manipuluar nga vetë partia, në favor të Arjan Ndojës, i cili fitoi mandatin me më shumë vota. Kalaja mori 7291 vota, ndërsa Ndoja 8249.

Kalaja kërkoi verifikimin e 39 kutive ku dyshon se ka pasur devijim të votës. Anëtarët e KAS i kërkuan që të sjellë prova konkrete deri të hënën, përfshirë shënimet e vëzhguesve dhe vendndodhjen e saktë të kutive problematike. Kalaja tha se i ka këto të dhëna dhe do t’i dorëzojë.

KAS e ka pranuar ankesën e Kalasë, por ende nuk ka vendosur për rinumërimin. Vendimi për këtë çështje pritet të merret të martën, më 10 qershor, në orën 13:00.