SPAK ka publikuar detaje të reja në lidhje me një nga operacionet më të mëdha të goditjes së trafikut ndërkombëtar të drogës. Bëhet fjalë për një organizatë të përbërë nga 4 grupe kriminale, të drejtuara nga shtetas shqiptarë, që vepronin në Finlandë, me origjinë trafiku nga Spanja dhe Holanda.

Në total, janë lëshuar 11 masa sigurie "arrest në burg", nga të cilat 9 janë ekzekutuar, ndërsa dy persona janë ende në kërkim.

Sipas njoftimit zyrtar të Prokurorisë së Posaçme, hetimi ka nisur që në qershor 2023 në bashkëpunim me autoritetet finlandeze, Europolin dhe policinë shqiptare. U përdorën metoda speciale hetimi si përgjime telefonike dhe regjistrime të fshehta.

Çfarë zbuloi hetimi?
– Trafikim dhe shpërndarje e 400 kg amfetaminë, 500 kg kanabis, si dhe sasi kokaine e ekstazi, kryesisht në qytetin e Helsinkit dhe zona të tjera të Finlandës.
– Përdorimi i telefonave të koduar dhe rrjete të organizuara shpërndarësish.
– Bashkëpunim mes grupeve kriminale, që në disa raste shkëmbenin edhe anëtarë mes tyre për të realizuar transportin dhe tregtinë e drogës.

Organizata kriminale operonte në mënyrë të mirëstrukturuar, me role të ndara për çdo fazë të trafikut  nga furnizimi në vendet e origjinës, deri te shpërndarja në rrugët e Finlandës.

Gjatë operacionit në Shqipëri janë kontrolluar banesa dhe ambiente biznesi, ndërsa janë sekuestruar prova materiale që pritet të ndihmojnë më tej hetimin. Hetimet do të vijojnë edhe në drejtim të pasurive të përfituara nga aktiviteti kriminal.

Ky hetim është rezultat i 18 muajve punë intensive dhe bashkëpunimi të ngushtë mes SPAK, Policisë së Shtetit, autoriteteve finlandeze dhe Europolit.