Policia shqiptare falë bashkëpunimit të ngushtë me partnerët në Emiratet e Bashkuara Arabe, pritet që të ekstradojë gjatë ditës së sotme dy të shumëkërkuar nga drejtësia në vendin tonë.
Përmes një njoftimi zyrtar, policia e shtetit bën të ditur se dy personat e arrestuar për vepra të ndryshme penale, pritet që përgjatë ditës së sotme të sillen në Shqipëri për t’u përballur me drejtësinë.
Dhe bëhet fjalë për vëllain e Nuredin Dumanit, Dashnor Dumanin, i dënuar nga GJKKO për vrasje dhe vjedhje me armë, si dhe për Armis Stafën, i cili është dënuar me akuzën se pastronte paratë e një grupi kriminal në Elbasan.
Burime zyrtare bëjnë me dije se ekstradimi po realizohet në bashkëpunim të ngushtë me autoritetet ligjzbatuese të Emirateve dhe INTERPOL-it. Në lidhje me orën e saktë të mbërritjes në Shqipëri, do të ketë një njoftim të mëvonshëm nga institucionet përkatëse.
Ky operacion konsiderohet një tjetër hap i rëndësishëm në luftën kundër krimit të organizuar dhe bashkëpunimit ndërkombëtar në drejtësi.
