Dy të rinj janë arrestuar në qytetin e Beratit si pjesë e një operacioni policor kundër shpërndarjes së drogës. Operacioni i koduar “Orders” u zhvillua nga policia lokale në bashkëpunim me prokurorinë e qytetit.
Në pranga ranë K. N., 21 vjeç dhe Nj. A., 19 vjeç, të dy banues në Berat. Sipas policisë, ata ishin të përfshirë në shpërndarjen e lëndës narkotike të llojit cannabis.
Gjatë kontrollit, 21-vjeçarit iu gjetën 330 doza të gatshme për shitje, ndërsa 19-vjeçari kishte një sasi të kësaj lënde me vete. Në shtëpinë e të riut 19-vjeçar u gjetën edhe dy thika që dyshohet se përdoreshin për ndarjen e drogës.
Po ashtu, policia ka nisur hetimet edhe ndaj babait të 21-vjeçarit, A. N., 44 vjeç, pasi në shtëpinë e tyre u zbuluan disa fishekë që mbaheshin pa leje.
Gjatë operacionit u sekuestruan lënda narkotike, armët e ftohta, municionet, shtatë telefona celularë dhe një automjet.
Policia ka theksuar se hetimet për këtë rast do të vijojnë për të zbuluar persona të tjerë të përfshirë në rrjetin e shpërndarjes së drogës në qytet.
