Një ngjarje që mund të përfundonte në tragjedi është shmangur falë ndërhyrjes së shpejtë të Policisë Kufitare në Shëngjin. Rreth orës 15:00 të datës 28 qershor 2025, Policia mori një njoftim urgjent për një mjet lundrues që kishte pësuar defekt pranë zonës turistike të njohur “Rana e Hedhun”, në Shëngjin.
Për shkak të kushteve të pafavorshme atmosferike, mjeti ishte larguar nga bregu duke rrezikuar jetën e dy personaveqë ndodheshin në bord.
Menjëherë pas alarmit, shërbimet e Policisë Kufitare Shëngjin, në bashkëpunim me strukturat e Drejtorisë Vendore të Policisë Lezhë, reaguan me shpejtësi duke u angazhuar me mjet lundrues dhe Jet Ski, për të dhënë ndihmën e nevojshme.
Falë veprimeve të shpejta dhe të koordinuara, mjeti lundrues u tërhoq deri në portin e Shëngjinit, ndërsa dy personat që ndodheshin në bord u nxorën në breg në gjendje të mirë shëndetësore.
Policia Kufitare vijon të monitorojë zonat detare në kuadër të sezonit turistik, duke theksuar rëndësinë e respektimit të rregullave të sigurisë nga ana e drejtuesve të mjeteve lundruese.
