Ministri i Brendshëm i Italisë, Matteo Piantedosi, njoftoi se 30 emigrantë janë kthyer nga qendra e Gjadrit në Shqipëri në vendet e tyre, ndërsa 30 të tjerë janë transferuar nga Italia në Shqipëri.
Ky veprim është pjesë e marrëveshjes mes Italisë dhe Shqipërisë për të strehuar emigrantët që kapen në ujërat ndërkombëtare, veçanërisht pranë Lampedusës. Qendrat në Shqipëri ishin planifikuar të strehojnë rreth 1,000 persona, por deri më tani kanë mbërritur vetëm disa dhjetëra.
Sipas të dhënave të Ministrisë së Brendshme italiane, nga fillimi i vitit 2025 deri tani kanë zbarkuar 23,662 emigrantë, një rritje prej 9% krahasuar me të njëjtën periudhë të vitit të kaluar (21,769).
Rritja e numrit të zbarkimeve tregon se projekti me Shqipërinë nuk ka pasur efektin pengues që pritej.
Shumica e emigrantëve vijnë nga vende si Bangladeshi, Egjipti dhe Nigeria – të cilat konsiderohen “vende të sigurta” dhe ishin parashikuar të dërgoheshin në Shqipëri për t’u dëbuar. Ndërkohë, ka rënie të ndjeshme të emigrantëve nga Siria, Iraku, Irani dhe Afganistani, për shkak të ndalimit pothuajse të plotë të nisjeve nga Turqia.
