Ilir Meta shprehet se ndaj tij janë bërë hetime të gjera dhe të shtrira në çdo cep të globit, përmes letër-porosive në kontinente, shtete, ishuj e banka, por pa asnjë rezultat konkret. Ai thekson se pas një hetimi 6-vjeçar nga SPAK, nuk është gjetur asnjë provë apo fakt që e lidh atë me ndonjë pasuri apo veprimtari të paligjshme gjatë gjithë karrierës së tij publike 32-vjeçare.

Sipas Metës, paraburgimi i tij është i pajustifikuar dhe shërben vetëm për të penguar angazhimin e tij politik si lider opozitar. Ai shpreh shqetësimin se autoritetet po presin letra-porosi për persona që janë të lirë dhe që, sipas tij, nuk kanë lidhje me çështjen.

Meta nënvizon se Partia e Lirisë do të dalë më e fortë nga kjo përballje me atë që ai e quan "narkoregjim", duke deklaruar se kauzat e tyre janë të patjetërsueshme. Ai e lidh qëndrimin e tij politik me 2 Marsin, duke e konsideruar atë si simbol të rikthimit të sovranitetit të popullit shqiptar, i cili sipas tij është cenuar rëndë me procesin zgjedhor të 11 majit.

Ai paralajmëron se brenda javës do të shterojnë rrugët në Gjykatën Kushtetuese dhe më pas do t’i drejtohen Strasburgut. Sipas tij, drejtësia aktuale është e ndikuar politikisht dhe mbron pandëshkueshmërinë e qeverisë së Edi Ramës. Në përfundim, ai shpreh bindjen se pluralizmi politik dhe llogaridhënia do të rikthehen në Shqipëri.