Julia Mezini
Bota po rrëshqet në shinat e “normalitetit të ri”, të krijuar nga pandemia, e cila vazhdon ta diktojë të ardhmen tonë.
Shkollat në Shqipëri u mbyllën në 9 mars të 2020-tës. Mijëra nxënës u izoluan, fillimisht. Për aktivitete, as që bëhej fjalë.
Por me kalimin e muajve, gjërat po tentojnë t’i kthehen normales.
Në këtë kuadër, në Parkun Kombëtar të Qafështamës, në Krujë, një grup të rinjsh dhe të rejash ,të ardhur nga zona të ndryshme të Shqipërisë, të drejtuar nga 4 trajnerë, me përvojë të gjatë, organizuan Kampin Veror Rinor EU4AL, një projekt i financuar nga Bashkimi Europian dhe implementuar nga CSR Communication Center.
“Ishte si një flakë shprese për ne”, - thotë Arditi, 17 vjeç, nxënës në gjimnazin “Sami Frashëri”, Tiranë.
Qafështama njihet për vetitë e saj kuruese. Prej saj merrte ujin e pijshëm familja e mbretit Zog, nga i ashtuquajturi “Kroi i Nënës Mbretëreshë”.
“Kjo përvojë ishte shëruese, edhe për tronditjen e madhe, që morëm nga pandemia e Covid 19-tës”, - thotë Marsida, 18 vjeç.
Të vendosur në resortin “Shkreli”, nga datat 24-28 gusht, të rinjtë u angazhuan në aktivitete, brenda ndërtesës, dhe jashtë në natyrë.
Dita e parë, e quajtur “E Kaltra”, ju kushtua promovimit të vlerave të BE-së, lidershipit, mundësive të ofruara, hapësirave të vullnetarizmit dhe ndihmës në komunitet e integrim.
Dita e dytë, “E Verdha”, u organizua si séance, për përdorimin e artit dhe formave të tjera alternative, për t’u dëgjuar dhe për të ndikuar vendimmarrjen e politikanëve. Qëndresë, nuk do të thotë vetëm ujë me presion, dhunë, shkopinj gome, por edhe piktura dhe grafite, siç bën artisti i rrugës, Banksy.
22 të rinjtë folën për këtë aktivist anonim, shumë të famshëm në Angli, për kuptimin dhe mesazhin, që përcjellin veprat e tij. Madje një grafit i tij doli në ankand, për një shifër, mbi 1 milion dollarë. Ai u mor ashtu siç ishte, me gjithë mur.
“Ishte interesante, të vrisje mendjen, për kuptimin e veprave të tij, që përçojnë më shumë se 1 apo 2 mesazhe, që duken me shikim të parë”, - thotë Arbasi, nxënës 17 vjeçar.
Gjithashtu u hartua dhe u ngrit grupi i punës, për platformën online, “Qendra Shqiptare e Njohurive për Politikën Rinore”, nismë e cila do t’i motivojë të rinjtë pjesëmarrës në këtë aktivitet, të bëhen një zë, i cili do të dëgjohet në shtrirje afatgjatë.
Dita e tretë, “Portokallia”, iu kushtua kënaqësive të natyrës. “Le të argëtohemi si europianët, me pak kosto dhe shumë kënaqësi”. Kjo ishte motoja e ditës së mbushur me ecje në pyll, barbeky, mësime për hapjen e tendës, e deri tek ndezja e zjarrit, me mjete rrethanore.
“Ndezjen e zjarrit, qëndrimin rreth tij, me shokët dhe shoqet e grupit, e përjetova edhe në një kuptim tjetër”, - thotë Soana, nxënëse nga Fieri. “Më dukej, sikur ndezëm zjarrin e shpresës sonë, për një të ardhme më të mirë, më të sigurtë, vazhdon ajo”.
Dita e fundit, “Jeshilja”, i hapi rrugën dhënies së certifikatave, për përmbylljen me sukses, të këtij kampi të shumëpritur, nga të gjithë. Të rinjtë realizuan foto dhe video, për të përjetësuar ato ditë rinore, në Parkun Kombëtar të Qafështamës.
