Kryesore

Meta rikthehet si… President

               Publikuar në : 10:06 - 18/09/21 liberale

Imponim në mbrojtje të Kushtetutës, e cilësoi presidenti Meta protagonizmin e tij politik të dy viteve të fundit. Sipas tij ishte zëri që duhej në një kohë kur parlamenti ishte jo funksional, maxhoranca kishte marrë çdo institucion dhe kishte zero opozitë. Pasi pranon se 25 Prilli është një hap drejt demokracisë, pret që llogari brenda Kuvendit ta kërkojë opozita , e dalë nga vullneti i votuesve

Pas zgjedhjeve të 25 Prillit, presidenti Meta do të habiste me mesazhin e tij, duke folur për proces të qetë e paqësor, i arritur në sajë të tij. Zgjedhjet, vijonte më tej ai, mund t’i shërbenin demokracisë dhe stabilitetit të vendit.

Habia vinte jo vetëm nga dy vitet që e panë kreun e shtetit në qendër të një beteje institucionale me qeverinë dhe Parlamentin që e patën nxitjen pikërisht nga shfuqizimi i datës së zgjedhjeve lokale, por edhe nga mesazhet e forta të zotit Meta pak ditë para së dielës së votimeve, kur fliste për mbrojtje të votës me “sfurqe”.

Por edhe pse u përfshi në një tjetër betejë deklaratash me ambasadoren amerikane, ai nuk ngurroi të kryente rolin e kreut të shtetit dhe simbolit të unitetit kombëtar, ndërsa parlamenti i vjetër votoi shkarkimin e tij për shkelje të Kushtetutës.

Dje nga Korça, presidenti i cili i është larguar disi polemikave frontale do të shprehej se  protagonizmi i tij në dy vitet e fundit, vinte i imponuar. Imponim, do të shtonte zoti Meta, në mbrojtje të demokracisë dhe Kushtetutës.

Kreu i shtetit shfuqizoi datën e zgjedhjeve të 30 qershorit 2019, me argumentimin se nuk duhet të lejonte votime moniste në një shtet pluralist dhe pëlqimin e palëve për të bërë një akt të tillë, e kishte gjetur pikërisht tek mosdakordësia e tyre.

Por dy vjet më vonë, ndërsa uronte Kryetaren e re të Kuvendit, krejt ndryshe nga sa kishte bërë opozita që nuk e votoi, ai i bëri thirrje opozitës se nuk ishte koha për një bojkot tjetër dhe se llogaridhënia bëhej në Kuvend.

“Aktualisht,  askush nuk duhet të presë që presidenti të marrë përsipër detyra që i takojnë aktorëve të tjerë politikë”, deklaroi presidenti Meta, duke shpresuar se opozita do të përmbushë përgjegjësitë e saj në parlament, “që ai të jetë funksional që sistemi i llogaridhënies të funksionojë në interes të publikut dhe institucionet e tjera të marrin veten”, deklaroi Meta.

Përgjigje kjo që vinte edhe si një formë pohimi se rolin e munguar të opozitës, dy vite jashtë institucioneve, po e kryente Presidenti që shpalli hapur një betejë në mbrojtje të Kushtetutës, sipas tij e përçudnuar nga pakti i 2008-s, por edhe nga ndryshimet e 2016-s.

“…në kushtet e braktisjes nga opozita të të gjitha institucioneve, por edhe në kushtet e përpjekjeve të pandalshme të maxhorancës për të kapur çdo institucion, në mënyrën më të veçantë Gjykatën Kushtetuese, për të kapur dhe institucionin e Presidentit që para zgjedhjeve dhe për të krijuar një situatë të pashpresë për demokracinë, ndryshimin dhe qytetarët…”, tha Meta.

I detyruar shtoi ai të respektojë Kushtetutën e vendit, u shpreh i gatshëm për të dekretuar ministrat e kabinetit Rama 3, duke rrëzuar përfundimisht spekulimet se nuk do ta bënte të mundur këtë. Kjo vinte edhe nga paradoksi i krijuar nga maxhoranca, që shkon të betohet tek një president të cilin e ka shkarkuar në Parlament dhe pret vendimin e Gjykatës Kushtetuese.

Tentativa e dytë për shkarkimin e presidentit buroi pikërisht nga pretendimet e një grupi deputetësh që gjykuan për shkelje të rëndë të Kushtetutës nga kreu i shtetit para, gjatë dhe pas fushatës zgjedhore, përmes deklaratave me përmbajtje të dhunshme.

Nëse do të përdoreshin termat e deputetëve të maxhorancës, që përmes rezolutës së qershorit të 2019-s i bënin thirrje presidentit  të kthehej brenda kornizave kushtetuese, deklaratat e djeshme të Metës ishin pikërisht ato të  një kreu shteti, neutral.

Ai pohoi se me zgjedhjet e 25 Prillit ishte bërë një hap, “por hapa të tjerë do të ndodhin në të ardhmen”, shtoi ai. Kreu i shtetit njohu legjitimitetin e zgjedhjeve, për të cilat PD akuzon se janë blerë, ndërsa LSI paraqiti pretendime në KAS e Kolegj Zgjedhor.

Meta, i përfshirë në debate me ambasadoren Yuri Kim, e dalë hapur kundër deklaratave të presidentit një ditë para zgjedhjeve dhe së cilës iu drejtua duke i thënë të mos hynte në çështjet e brendshme të një shteti do të ndalej dje edhe tek çështja Berisha.

Pasi ka pranuar publikisht miqësinë me ish-kryeministrin, ai theksoi rëndësinë e sovranitetit, një term ky i përdorur së fundi nga Berisha, i cili akuzon kreun e PD-së se me vendimin për përjashtimin e tij nga Grupi Parlamentar i ka hequr partisë sovranitetin.

“Sa i takon sovranitetit padiskutim që fjala kyç për dekadat që vjen është sovranitet. Që nuk do të thotë mospërmbushje të detyrave të Shqipërisë ndaj NATO ku jemi anëtar prej kohësh apo BE, ku dëshirojmë të anëtarësohemi”, u shpreh Meta, duke vënë edhe njëherë mbi institucionet dhe organizatat ndërkombëtare Kushtetutën e vendit. “Besoj se në radhë të parë është e rëndësishme t’u kthejmë sovranitetin qytetarëve. Ata të  mos injorohen e përjashtohen më, të mos vendosen para faktit të kryer, mos jenë më viktimë e arbitraritetit e kulisave që kanë kërkuar e kërkojnë ta nxjerrin këtë sistem jashtë”, ka shtuar ai.

Ambasadorja Yuri Kim në një intervistë dhënë Zërit të Amerikës këto ditë, i cilësoi teori konspiracioni pretendimet se ShBA ka synime të dëmtojë çështjet e brendshme të Shqipërisë, ndërsa tha se  përcaktimi publik si “non grata” i zotit Berisha ka ardhur përmes një procesi të gjatë shqyrtimi. Kim madje tha se kjo ishte e dukshme dhe se ata që ishin habitur nga ky vendim, ishin të pasinqertë.

“Doktori është si vera, sa më i vjetër aq dhe më tërheqës e demokrat bëhet”, do të shprehej Meta për Berishën, duke e kritikuar në mënyrë të tërthortë vendimin e zotit Basha për përjashtimin e tij nga Grupi Parlamentar i Partisë Demokratike. Presidenti do ta kritikonte opozitën për daljen nga Parlamenti dy vjet më parë, duke deklaruar se rrezikonte të kthehej në një OJQ pa vendimmarrje. Kryetarja e LSI-së, Kryemadhi pranoi pas rezultatit të zgjedhjeve, se vendimi për të braktisur parlamentin më 2019-n kishte qenë i gabuar, ndërsa kjo forcë duket se i vuajti hapur pasojat në numrat tejet të tkurrur të deputetëve në këtë legjislaturë.

Ndërsa i ka vlerësuar zgjedhjet e 25 Prillit si një hap i parë për demokracinë dhe nuk e sheh më të nevojshme protagonizmin e tij si në një kohë kur sipas tij kishte “zero opozitë në institucione kryesore dhe një parlament jo funksional”, presidenti Meta i cili duket se i ka lënë pas kohët e ngërçeve me kreun e KED-së për  gjyqtarët e Kushtetueses  apo akuzat për Ramaformë është në pritje të vendimit për shkarkimin e tij, ndërsa prej kohësh deklaron se mandati i tij përfundon në korrik të 2022-shit. Por, edhe për zgjedhjen e pasuesit të tij do të duhet një parlament funksional, me opozitën brenda. Me qëndrimet e tij të fundit dhe deklaratën e djeshme, Opozitari Meta – siç e etiketonte kryeministri Rama gjatë fushatës zgjedhore – nuk është më.

Qeveria e re para Presidentit të Republikës

Kryeministri Edi Rama dhe ministrat e qeverisë së re u miratuan me 77 vota pro, 53 kundër dhe 1 abstenim mëngjesin e sotëm nga Kuvendi. Sot,  Rama bashkë me anëtarët e tjerë të kabinetit do të betohen te Presidenti Meta.

Dje  nuk ka ndodhur betimi pasi Meta ndodhet për vizitë në Korçë për vizitë pune dhe ceremoni dekorimi për 4 personalitete.

Qeveria “Rama 3” do të përbëhet nga 12 gra e 5 burra bashkë me kryeministrin teksa po shkon të betohet tek një President që ka marrë ‘vulën’ e shkarkimit nga Kuvendi i vjetër, por jo nga Gjykata Kushtetuese.

Ishte mazhoranca e PS që inicioi shkarkimin e Metës me pretendimin se kishte ndikuar dhe ndërhyrë në zgjedhjet e 25 prillit duke dalë nga statura e Presidentit.

Gjithsesi Meta e ka dhënë një sinjal dakordësie me qeverinë e re pasi ka emëruar dekretimin e të gjithë anëtarëve të rinj të kabinetit Rama, nga kryeministri tek ministrat që vijojnë.

Basha: U formalizua PPP-ja korruptive Rama-Doshi-Rakipi

Kreu i Partisë Demokratike, Lulzim Basha ka reaguar në lidhje me votimin e qeverisë së re, ndërsa nuk i kurseu sulmet për kryeministrin Edi Rama.

Në një dalje publike për mediat, Basha tha se sot është formalizuar PPP Rama-Doshi-Rakipi, ndërsa e cilësoi qeverinë e re një fatkeqësi kombëtare.

“77 votat e sotme, janë formalizimi i PPP-së, Rama-Doshi-Rakipi bashkë me kriminelët e dosjes 184, të vjedhjes së zgjedhjeve në Dibër dhe të Dosjes 339 të Shijakut bashkë me Rahman Rrajën të njohur ndërkombëtarisht për rekordet e tij kriminale, janë fatkeqësia më e madhe për çdo shqiptarë, janë fatkeqësia kombëtare.

Qëllimi i kësaj PPP, i kësaj pakice plaçkitësish është të pasurojnë veten e tyre, të mbajnë pushtetin në kurriz dhe në kosto të familjeve shqiptare. Qëllimi ynë është të bëjmë gjithçka për t’i larguar këta armiq të demokracisë nga salla e parlamentit dhe për t’i kthyer shqiptarëve demokracinë, parlamentin dhe qeverisjen e vullnetit të tyre të lirë.”, pohoi Basha. /Gazeta Liberale


KOMENTO (0)

Shkruaj nje koment

Your email address will not be published. Required fields are marked *

* *

Back